धनगढी : प्रधानमन्त्री कृषि आधुनिकीकरण परियोजनाअन्तर्गत निर्माण नै नगरिएको माटो परीक्षण प्रयोगशालाको भुक्तानी गरिएको छ । कैलालीको कैलारी गाउँपालिकामा एक वर्षपहिले निर्माण हुनुपर्ने माटो परीक्षण प्रयोगशालाको झन्डै २१ लाख भुक्तानी गरिएको हो ।
कैलारी गाउँपालिका–८ लौसामा रहेको अँखुवा सहकारी संस्था र प्रधानमन्त्री कृषि अधुनिकीकरण परियोजनाबीच एक वर्षपहिले नै माटो परीक्षण प्रयोगशाला निर्माण गर्ने सम्झौता भएको थियो ।
आयोजनाले भने उपकरण खरिद गरेको बिल आएकाले सहकारीलाई भुक्तानी गरेको जनाएको छ । मिनी ल्याबका उपकरणको बिल आएपछि मात्रै भुक्तानी दिएको प्रधानमन्त्री कृषि आधुनिकीकरण आयोजनाका लेखापाल कृष्णप्रसाद सोवले जानकारी दिए ।
२० लाख ९४ हजारको मिनि ल्याबको योजना दिएबापत परियोजनाका प्रमुख रामनन्दन यादवलले सहकारीका पूर्वअध्यक्ष चौधरीबाट ६० हजार रकम घुस लिएको खुल्न आएको हालै चयन भएको सहकारीको नयाँ कार्य समितिले जनाएको छ ।
सहकारीक एक जना कार्यसमितिका सदस्यको नाममा दिइएको चेकको अर्धकट्टीमा उक्त रकम आयोजना प्रमुख यादवलाई दिएको उल्लेख छ । प्रधानमन्त्री कृषि आधुनिकीकरण परियोजनाका प्रमुख रामानन्द यादवलाई २५ हजार घुससहित अख्तियार दुरुपयोग अनुसन्धान आयोगले पक्राउ गरेर काठमाडौं पुर्याएको छ ।
किसानलाई माटो सुहाउँदो खेतीका लागि माटो परीक्षणको रिपोर्ट प्रदान गर्न प्रधानमन्त्री कृषि आधुनिकीकरण परियोजनाअन्तर्गत प्रयोगशाला निर्माण गरिने भएको हो । तर, अहिले भने प्रयोगशालाको काम अलपत्र परेको छ ।
परियोजनाको सबै रकम भुक्तानी गरिसकेको छ । मिनि प्रयोगशाला स्थापनाका लागि अधिकांश उपकरणसमेत खरिद गर्न बाँकी रहेको अवस्थामा अधुरै कामको पूरै भुक्तानी दिएपछि स्थानीयले अनियमितताको आशंका गरेका छन् ।
मिनि ल्याबका लागि आवश्यक पर्ने सामान नकिनिएका कारण मिनि ल्याब सञ्चालन गर्न नसकिएको सहकारी संस्थाका सचिव पूर्णिमा चौधरीले बताइन् ।
सहकारी संस्थाका तत्कालीन अध्यक्ष सोनुराम चौधरीको पालामा मिनि ल्याबको योजना परेको थियो । तर, नयाँ कार्यसमिति, मिनि ल्याबबारे अलमलमा छ । ०७४ पुस २७ गतेको साधारणसभाले सहकारीको नयाँ कार्यसमिति चयन गरेको हो । मिनी ल्याब सञ्चालनका लागि आवश्यक पर्ने मेसिनरी र भौतिक सामग्रीबारे केही थाहा नभएको नवनिर्वाचित अध्यक्ष नरसिंह सार्कीले बताए ।
नयाँ कार्यसमितिले २० लाख ९४ हजार खर्चको हिसाबसमेत मिलान गर्न नसकेको अध्यक्ष सार्कीले बताए । सहकारीको नवनिर्वाचित कार्यसमितिले पूर्वअध्यक्ष सोनुराम चौधरीलाई ल्याब सञ्चालन र खर्चको विवरण बुझाउन पत्र पठाएको छ ।
प्रतिक्रिया दिनुहोस !
