भक्तपुर : भक्तपुरका थप १४ हजार ३५ जनाले कोरोना भाइरसविरुद्धको खोप लिएका छन् । उनीहरुले संयुक्त राज्य अमेरिकाले सहयोगस्वरुप दिएको जोन्सन एण्ड जोन्सन कम्पनीको जानसेन खोप लिएका हुन् ।
स्वास्थ्य कार्यालय भक्तपुरका कार्यालयका प्रमुख कृष्ण मिजारले ५० देखि ५४ वर्ष उमेर समूहका १४ हजार ३५ जनाले एक मात्रामात्रै लगाए पुग्ने जानसेन खोप लगाएको बताए ।
उनका अनुसार ७ हजार २३४ जना महिला र ६ हजार ८०१ जना पुरुषले जानसेन खोप लगाएका छन् । जसमध्ये सबैभन्दा बढी सूर्यविनायक नपाका ३ हजार ३६२ जना महिला र ३ हजार ४० जना पुरुष गरी ६ हजार ४२० जनाले जानसेन खोप लगाएका छन् ।
चाँगुनारायण नपाका एकहजार ६१२ महिला र एकहजार ५९४ पुरुष गरी ३ हजार २०६ जना तथा मध्यपुर थिमि नपाका एकहजार ६२१ महिला र एकहजार ५८१ महिला गरी ३ हजार २०२ जनाले पनि अमेरिकी खोप लगाएका छन् ।
भक्तपुर नपाका ६२१ महिला र ५८६ पुरुष गरी एकहजार २०७ जनाले मात्रै अमेरिकी खोप लगाएका छन् । यहाँ लक्ष्यभन्दा धेरै कमले अमेरिकी खोप लगाएका छन् ।
अमेरिकी खोप लगाउनेको संख्या थप भएसँगै भक्तपुरमा खोप लगाउनेको संख्या एक लाख ७ हजार १३३ पुगेको स्वास्थ्य कार्यालय भक्तपुरले जनाएको छ ।
कार्यालयका अनुसार यससँगै भक्तपुरको जनसंख्याको करिब २९ प्रतिशतले कोरोना खोप लगाएका छन् । भक्तपुरमा ३ लाख ७४ हजार २१५ जनसंख्या रहेका छन् । त्यस्तै १८ वर्षमाथिको जनसंख्या २ लाख ५१ हजार ७७२ जना रहेकोमा करिब ४३ प्रतिशतले खोप पाएको कार्यालय प्रमुख मिजार बताउँछन् ।
उनका अनुसार भक्तपुरका ६१ हजार ८०० ले चिनियाँ खोप भेरोसेलको दुईमात्रा लिइसकेका छन् । त्यस्तै १९ हजार ८९६ जनाले भेरोसेलको पहिलो मात्रा लिएका छन् ।भारतीय खोप कोभिशिल्ड ५ हजार ५७५ जनाले दुई मात्रा र ५ हजार ८२७ जनाले एकमात्रा लिएको प्रमुख मिजारले जानकारी दिए ।भक्तपुरमा बुधबारसम्म २३ हजार १२८ जनामा कोरोना भाइरस संक्रमण पुष्टि भइसकेको छ । जसमध्ये २२ हजार १२६ जना डिस्चार्ज भइसकेका छन् ।
भक्तपुरमा अझै ७०९ जना सक्रिय संक्रमित रहेका छन् । भक्तपुरका १९६ पुरुष र १०८ महिला गरी ३०४ जना संक्रमितको मृत्यु भइसकेको छ ।
प्रतिक्रिया दिनुहोस !
