धनकुटा : चौविसे गाउँपालिका-६ शिखरपुरस्थित हात्तिटार खेल मैदानमा आगामी चैत्र २८ गतेदेखि दोस्रो जय दगलसिंह स्मृति गोल्डकप फुटबल प्रतियोगिता सञ्चालन हुने भएको छ। हात्तिटार स्पोर्टस् क्लबको आयोजनामा आगामी चैत्र २८ देखि वैशाख १ गतेसम्म दोस्रो जय दगलसिंह स्मृति गोल्डकप फुटबल प्रतियोगिता सञ्चालन हुन लागेको हो।
गतवर्ष देखि सुरु भएको प्रतियोगिताको यो दोस्रो संस्करण हो। प्रतियोगिताको दोस्रो संस्करणमा ८ टिमको सहभागिता हुने आयोजक हात्तीटार स्पोर्ट्स क्लबका अध्यक्ष रत्नबहादुर राईले बताए। उनका अनुसार प्रतियोगिताको विजेताले नगद १ लाख रुपैयाँ सहित ट्रफी र मेडल प्राप्त गर्नेछ भने उपविजेता टिमलाई नगद ५० हजार रुपैयाँसहित ट्रफी र मेडल प्रदान गरिनेछ। हरेक खेलमा म्यान अफ दी म्याच पुरस्कारको व्यवस्था गरिएको छ। प्रतियोगिताभर उत्कृष्ट प्रदर्शन गर्ने एक जनालाई सर्वोत्कृष्ट खेलाडीको रुपमा र विधागततर्फ उत्कृष्ट हुने खेलाडीहरूलाई पुरस्कारको व्यवस्था गरिएको उनको भनाइ छ। गतवर्ष डागीहाँट फुटबल क्लब भाउनी विजेता वनेको थियो।
प्रतियोगितालाई भव्य रुपमा सञ्चालन गर्न चौविसे गाउँपालिका र साँगुरीगढी गाउँपालिका विशेष सहयोग प्राप्त भएको छ। त्यस्तै देश तथा विदेशमा रहेका सहयोगी दाताहरूलाई आर्थिक सहयोग प्राप्त भइरहेको अध्यक्ष राईको भनाइ छ। नकआउट चरणमा हुने प्रतियोगितामा आयोजक सहित ८ टिमको सहभागिता रहेको छ। आयोजक बाहेक फाक्सिव फुटबल क्लब, डाँडाबजार फुटबल क्लब, युनिटी स्पोर्ट्स क्लब, सिसिडिआइसी फुटबल क्लब मौनावुधुक, देउराी युवा क्लब, डाँगीहाट फुटबल क्लब र कटारी फुटबल क्लब छन्।
प्रतियोगितामा उद्घाटन खेल आयोजक हात्तिटार स्पोर्टस् क्लब र फाक्सिव क्लबबीच हुनेछ। उद्घाटन खेल चैत्र २८ गते हात्तिटार खेल मैदानमा हुनेछ। क्लबले सार्वजनिक गरेको खेल तालिका अनुसार आयोजक र फाक्सिब बीचको पहिलो खेल बिहान ११ बजे हुनेछ। सोही दिन सीसीडीआइसी फुटबल क्लब मौनावुधुक र देउराली युवा क्लब बीच दिउँसो २ बजे हुने खेल तालिकामा उल्लेख छ।
प्रतिक्रिया दिनुहोस !
