पर्यटकीय थलो बन्दै सहिद उद्यान
बिर्तामोड : झापाको अर्जुनधारा नगरपालिकामा रहेको सुखानी सहिद स्मृति उद्यान पर्यटकका लागि रोजाइको केन्द्र बन्न थालेको छ ।
साबिक मेची अञ्चलको मुख्य व्यापारिक क्षेत्र बिर्तामोडनजिकै रहेको यो क्षेत्र शान्त, मनोरम र शीतल भएकाले गर्मीको समयमा पर्यटकको चहलपहल अझै बढेको जनाइएको छ । सालबारीस्थित २६ हेक्टर क्षेत्रफलमा फैलिएको यो उद्यानमा पोखरी, पार्क र लोप हुन लागेका कछुवासहितका वन्यजन्तु संरक्षण गरी राखिएका छन् । गर्मीले आत्तिएकाहरूलाई यो स्थानमा पुग्दा सान्त्वना मिल्ने आगन्तुक भीम शिवाकोटीले बताए । ‘गर्मीले के गरौं र कसो गरौं भएका बेला सरर यहाँ आयो’, उनले भने, ‘शीतल ठाउँ, झोलुंगे पुल र पोखरी देख्दा त्यसै ठन्डा हुन्छ ।’ यो स्थलमा झापासहित इलाम र मोरङबाट सबैभन्दा धेरै स्थानीय घुम्नका लागि आइपुग्ने गरेका छन् ।
पञ्चायतकालमा भएको आन्दोलनका क्रममा ज्यानको आहुति दिएका सहिदको स्मृतिलाई ताजा राख्न उद्यान स्थापना भए पनि पर्यटकीय क्षेत्रका रूपमा विकास भएको उद्यान व्यवस्थापन समितिका अध्यक्ष बिर्खबहादुर प्रधानले बताए ।
उद्यानभित्र झापा किसान विद्रोहमा जीवन बलिदान गरेका वीरेन राजवंशी, रामनाथ दाहाल, नेत्र घिमिरे, कृष्ण कुइँकेल र नारायण श्रेष्ठको पूर्ण कदका प्रतिमा राखिएका छन् । झापाबाट इलाम जेल सार्ने भन्दै २०२९ साल फागुन २१ गते सुखानी जंगलमा लगेर उनीहरू गोली हानी मारिएका थिए ।
उद्यानको मध्यभागमा रहेको अढाई हेक्टर क्षेत्रफलको प्राकृतिक तलाउ पर्यटकका लागि मुख्य आकर्षण रहेको प्रधानको भनाइ छ । व्यवस्थान समितिले तलाउमा पर्यटकलाई शयर गराउन चारवटा पाइडल डुंगाको व्यवस्था गरेको छ ।
प्राकृतिक वातावरणले भरिपूर्ण उद्यान भएकाले वनभोज खान, घुमफिर गर्न, तलाउमा डुंगा सयर गर्न र मन बहलाउन यहाँ पुग्ने गरेको स्थानीय प्रदीप लिम्बू बताउँछन् । सुखानी सहिद स्मृति प्रतिष्ठानले केही वर्षयता उद्यानभित्र पूर्वाञ्चलकै पहिलो कछुवा संरक्षण तथा प्रजनन केन्द्र स्थापना गरेकाले आकर्षण अझै थपिएको छ । उद्यानमा पाँच प्रजातिका कछुवा संरक्षण गरी राखिएका छन् । दैनिक औसत डेढ सय जना घुम्न आउने र नयाँ वर्ष, भ्यालेन्टाइन दिवस, शनिबार र चाडबाडका बेला घुइँचो लाग्ने गरेको जनाइएको छ ।