सूर्यविनायक च्याम्पियन
भक्तपुर : भक्तपुरको सूर्यविनायक नगरपालिका भक्तपुरमा मंगलबार सम्पन्न अन्तरनगर मेयर कप पुरुष भलिबल प्रतियोगिताको उपाधि जितेको छ । भक्तपुर नगरपालिकाद्वारा आयोजित प्रतियोगिताको फाइनलमा कैलालीको गोदावरी नपालाई ३-१ सेटमा पन्छायो । सूर्यविनायकले २३-२५, २५-२३, २५-२३, २५-१५ को जित निकालेको थियो । उपाधिसँगै सूर्यविनायकले एक लाख ५१ हजार रुपैयाँ पुरस्कार पायो । उपविजेता गोदावरीले ७५ हजार रुपैयाँमा चित्त बुझायो।
प्रतियोगितामा सूर्यविनायक चित्रबहादुर केसी मोस्ट भ्यालुयबल खेलाडी र उत्कृष्ट सर्भर बन्न सफल भए । सूर्यविनायकलाई उपाधि जिताउन योगदान गरेका उनले १० हजार रुपैयाँ पाए । सूर्यविनायकका उत्सव खड्का उत्कृष्ट सेटर र कमल सुनार उत्कृष्ट ब्लकर भए । गोदावरीका तारा भट्ट उत्कृट स्पाइकर र विनोद चन्द उत्कृष्ट डिफेन्डर घोषित भए ।
उत्कृष्ट सबैले जनही पाँच हजार रुपैयाँ हात पारे ।
प्रतियोगिताकै दाबेदार मानिएको ललितपुर महानगरपालिका चौथोमा सीमित हुन पुग्यो । नेपाली भलिबलका राष्ट्रिय कप्तान इम रानामगरको नेतृत्वको ललितपुर लिगमा हराएको रूपन्देहीको तिलोत्तमा नगरपालिकासँग ३-० को सोझो सेटमा पराजित भयो । तेस्रो भएको तिलोत्तमाले ३० हजार र ललितपुरले २० हजार रुपैयाँ पुरस्कार पाए । प्रतियोगितामा देशभरका २१ नगरपालिकाको सहभागिता रहेको थियो ।
प्रतिक्रिया दिनुहोस !
