ओखलढुंगा : जिल्लाका दुई सडक बजेट अभावमा अधुरै छन् । २०७१ सालमा सम्बन्धित क्षेत्रका सांसदको सिफारिसमा छनौट भएका लिखु एकवार सडक र मोलुङ एकवार सडकमा बजेट नहुँदा काम अधुरै छन् ।
जिल्लाको विकासमा ‘लाइफ लाइन’ मानिएका सडकमा बहुवर्षे ठेक्का लगाएर काम थाले पनि बजेट नआउँदा काम अधुरै रहेको हो । रणनीतिक सडकका रुपमा रहेका लिखु र मोलुङ एकवार सडकको काम २०७१ सालबाट सुरु भएको थियो। सम्बन्धित निर्वाचन क्षेत्रका सांसदहरुको सिफारिसमा रणनीतिक सडकका रुपमा छनोट गरिएका ती सडकको अहिले अवरुद्ध छन् ।
मोलुङ एकवारमा गत वर्ष ६.५ किलोमिटर कालोपत्रे र ३ किलोमिटर बाँकी ट्रयाक खोल्न लगाइएको ठेक्काको काम गरेको समेत भुक्तानी भएको छैन । भूक्तानी नहुँदा काम छाडेर निर्माण व्यवसायीले निर्माण उपकरण समेत हटाउन थालेका छन् भने कामदारले समेत पैसा पाएका छैनन् ।
३ करोड बढीको बिल पेश भएकोमा बजेट अभावले ७० लाख मात्रै रकम भुक्तानी गर्न सकिएको हर्कपुर सडक डिभिजन कार्यालयका प्रमुख सिंह बहादुर विष्टले जानकारी दिए । उनका अनुसार रकम अभावका कारण २ करोड हाराहारी काम भएको रकम समेत भुक्तानी हुन सकेको छैन ।
९ वर्षपहिले तत्कालीन सांसद यज्ञराज सुनुवारको सिफारिसमा छनौट गरेर जिल्लालाई उत्तर दक्षिण जोड्न सुरु गरिएको उक्त सडक संघीयता कार्यन्वयनपछि प्रदेश र संघ कस्को क्षेत्राधिकारमा पर्ने भन्ने विवादले काम हुन सकेको थिएन ।
गत वर्ष लागेका ठेक्काको समेत रकम निकासा नभएपछि कामदारले समेत रकम भुक्तानी नपाउँदा कार्यालयमै आउन थालेको प्रमुख विष्टको भनाइ छ । विभाग र मन्त्रालयमा सबै फायल पेश गरेर अर्थ मन्त्रालयमा समन्वय भइरहेको उनले जानकारी दिए ।
निर्माण कम्पनी महालक्ष्मी भूजेल जेभीका अनुसार २२ करोड ७० लाखमा ६.५ किलोमिटर कालोपत्रे र ३ किलोमिटर बाँकी ट्रयाक खोल्ने ठेक्का सम्झौता भएको हो । सम्झौतापछि भएको काममध्ये १ करोड ७७ लाख बढीको बिल भुक्तानी नभएपछि कात्तिकमा भुक्तानीका लागि ताकेता गरे पनि बजेट अभावका कारण दिन नसकेको कार्यालयले जानकारी दिएको कम्पनीका प्रमुख तेजबहादुर भूजेलले बताए ।
सम्झौता भए पनि करोडौं रकमको काकी भुक्तानी नभएकाले अरु काम गर्न नसकिने अवस्थामा पुगेको उनको भनाइ छ । लामो समयसम्म काम गरेको रकम भुक्तानी नभएपछि निर्माण कम्पनीले सडक निर्माण उपकरणहरु समेत हटाउन थालेको छ । उक्त सडक पुरा भएमा ओखलढुंगा सदरमुकाम र पश्चिमका भू-भागबाट मध्यपहाडी राजमार्गको घुर्मी एक घण्टामा पुगिन्छ ।
त्यस्तै मध्यपहाडीकै सिन्धुलीको फिक्लल जाड्ने लिखु एकवाको अवस्था पनि नाजुक छ । बजेट अभावमा पटक पटक काम नहुने र ठेक्का लिएका ठेकेदारले समयमा काम नगर्दा मोलुङसँगै सुरु भएको यो सडकको प्रगति झन् न्यून छ । यो सडक सांसद रामहरि खतिवडाको सिफारिसमा छनौट भएको हो ।
लामो समय काम रोकिएर गत वर्ष आएको ५० लाख बजेटको ठेक्का लागेर सम्झौता भएको छ । त्यसले गे्रड नमिलाइ खोलिएका विगतका ट्रयाकको ग्रेड मिलाउने र करिब ६ सय मिटर रक कटिङको काम हुने इञ्जिनियर राम बिलास शाहले बताए । उनले विभिन्न कर्यालय हुँदै जिम्मेवारी सरेर आएको,बजेट नआउने भएकाले काम रोकिने आदि कारण यी सडकहरुको यकिन विवरण समेत भन्न सकिने अवस्था नरहेको शाहले बताए ।
जिल्लाको पूर्वाधार विकास अन्र्तगत सांसदको सिफारिसमा रणनीतिक योजना छनौट गर्ने र तिनलाई प्रथामिकता दिने विगत सरकारको योजना अनुसार ६५ जिल्लामा यस्ता रणनीतिक सडकहरु छनौट भइ काम शुरु भएपनि अधिकांशलाई सरकारले बजेट नदिँदा अवरुद्ध छन् ।
तीन जिल्ला हेर्ने हर्कपुर सडक डिभिजन कार्यालयले खोटाङ र सोलुका लागि १०/१० करोड तथा ओखढुंगाका लागि १२ करोड बजेट तथा सडकहरुको स्टाटस पेश गरेर बजेट माग गरेको थियो । बजेट अभावले रणनीतिक सडक अधुरा रहँदा अन्य विकास निर्माणका काममा समेत असर परेको छ।
वर्तमान सरकारले रणनीति सडकका रुपमा छनौट भएका योजनाहरुमा चासो नदिएको जिल्लाबासीको गुनासो छ ।
प्रतिक्रिया दिनुहोस !
