पोखरा : ४ नम्बर प्रदेशस्तरीय अन्नपूर्ण पोस्ट् इन्टरनेसनल कर्पोरेट ब्याडमिन्टन प्रतियोगिताको पुरुष एकलतर्फको उपाधि कास्कीका भूगोल गुरुङले जितेका छन् । पोखरा रंगशालास्थित ब्याडमिन्टन हलमा भएको प्रतियोगितामा गुरुङले बागलुङका विवेक जीसीलाई १८-२१, २१-८, २१-२ को तेस्रो सेटमा पराजित गरे ।
यसैगरी महिला एकलतर्फ कास्कीकी आकृति केसी च्याम्पियन बनिन् । केसीले कास्कीकै प्रजिता गुरुङलाई २१-१८, २१-५ को सोझो सेटमा पराजित गरिन् ।
प्रतियोगिताको मिक्स डबल्समा कास्कीका यमकुमारी गुरुङ र विशाल खड्काको जोडीले बागलुङका मीना श्रेष्ठ र विवेक जीसीको जोडीलाई २१- १७, २१- १३ को सोझो सेटमा पराजित गर्दै प्रथम भए ।
महिला एकल जुनियरमा कास्कीकी आकृति केसीले कास्कीकै प्रजिता गुरुङलाई पराजित गर्दै उपाधि जितिन् । केसीले गुरुङलाई २१-१३, १६-२१, २२-२० मा पराजित गरिन् । केसी महिला एकलको पनि च्याम्पियन हुन् । पुरुष डबल्सतर्फको खेलमा कास्कीका विधान अधिकारी र विशाल बस्नेतको जोडीले कास्कीकै भूगोल गुरुङ र विशाल खड्काको जोडीलाई २१-१०, १७-२१, २१-१८ को सेटमा पराजित गरे।
यू-१९ पुरुषतर्फको खेलमा कास्कीका विधान अधिकारीले बागलुङका सलिन पौबीलाई २१-५, २१-१४ को सोझो सेटमा पराजित गर्दै उपाधि हात पारे । प्रदेशस्तरीय प्रतियोगितामा पहिलो र दोस्रो हुने खेलाडीले काठमाडौंमा हुने अन्तिम चरणको खुलातर्फको अन्नपूर्ण पोस्ट् इन्टरनेसनल कर्पोरेट ब्याडमिन्टन प्रतियोगिता भाग लिन पाउनेछन् ।
प्रतियोगितामा प्रदेश नम्बर ४ का ६९ जना खेलाडीको सहभागिता रहेको थियो । प्रतियोगिताका विजयी खेलाडीलाई प्रहरी नायब महानिरीक्षक (डीआईजी) दानसिंह बोहरा, राष्ट्रिय खेलकुद परिषद्का पूर्वसदस्य जयलाल हमाल, कास्की जिल्ला ब्याडमिन्टन संघका अध्यक्ष डम्बरसिंह गुरुङले पुरस्कार प्रदान गरे ।
डीआईजी बोहराले अन्नपूर्ण पोस्ट्ले सामाजिक उत्तरदायित्वअन्तर्गत प्रदेशस्तरीय र अन्तर्राष्ट्रियस्तरको प्रतियोगिता गरेर खेलको प्रवद्र्धनमा महत्वपूर्ण भूमिका खेलको बताए । राष्ट्रिय खेलकुद परिषदका पूर्वसदस्य जयलाल हमालले खेलकुदको विकासका लागि प्रतियोगिता निरन्तर हुनुपर्नेमा जोड दिए ।
प्रतिक्रिया दिनुहोस !
