जुरिच : आयोजक राष्ट्र रुस आगामी विश्वकपमा सहभागी ३२ राष्ट्रमध्ये फिफा वरीयतामा सबैभन्दा तल परेको छ । विश्व फुटबल महासंघ (फिफा) ले बिहीबार सार्वजनिक गरेको वरीयतामा रुस चार स्थान खस्कँदै सबैभन्दा तल ७०औं स्थानमा पुगेको हो । नयाँ वरीयतामा साउदी अरेबियाले पनि आयोजक रुसलाई जितेको छ । साउदी यसअघिको वरीयतामा रुसभन्दा तल थियो ।
नयाँ वरीयतामा साउदी ६७औं स्थानमा छ । साउदीको स्थान फेरबदल भएको छैन । संयोगवश आगामी विश्वकपमा रुस र साउदी समूह ‘ए’ मै परेका छन् । विश्वकपको उद्घाटन खेल पनि जुन १४ तारखिमा रुस र साउदीबीच नै हुनेछ । समूहगत चरणमा यी दुई टोलीले बलिया उरुग्वे र इजिप्टको सामना गर्नु पर्नेछ । रुसले विश्वकप तयारीका लागि खेलेका पछिल्ला अन्तर्राष्ट्रिय खेलमा निराशाजनक प्रदर्शन गरिरहेकाले पनि उसको स्थान खस्किएको हो ।
दुई दिनअघि रुसले घरेलु मैदानमा टर्कीसँग १-१ गोलको बराबरी खेलेको थियो । विश्वकपमा सहभागीमध्ये फिफा वरीयताको शीर्ष स्थानमा साबिक विजेता जर्मनी यथावत् छ । दोस्रो स्थानमा ब्राजिल, तेस्रोमा बेल्जियम, चौथोमा पोर्चुगल, पाँचौंमा अर्जेन्टिना, छैटौंमा स्विट्जरल्यान्ड र सातौं स्थानमा फ्रान्स यथावत् छन् । दुई स्थान सुधार गरेको पोल्यान्ड आठौं स्थानमा उक्लिएको छ ।
यसैगरी विश्वकपमा बलियो मानिएको स्पेन दुई स्थान खस्कँदै १०औं स्थानमा झरेको छ । चिली नवौं स्थानमा यथावत् छ । विश्वकप छनोट हुन नसकेको नेदरल्यान्ड्स, वेल्स र इटाली पनि वरीयताको शीर्ष २० मा अटाएका छन् । विश्वकप टोली मेक्सिको १५औं, अफ्रिकन टोली ट्युनिसिया २१औं र एसियाको बलियो टोली अस्ट्रेलिया ३६औं स्थानमा छन् । फिफाको वरीयतामा नेपाल भने तीन स्थान सुधार गर्दै एक सय ६१औं स्थानमा उक्लिएको छ ।
प्रतिक्रिया दिनुहोस !
