यी फुटबलर : जसले दुई देशबाट विश्वकप फाइनल खेले
![यी फुटबलर : जसले दुई देशबाट विश्वकप फाइनल खेले](https://annapurnapost.prixacdn.net/media/albums/Luis_Monti_20180608025855_Th550EoccV.jpg)
विश्वकप टोलीमा पर्ने सपना हरेक फुटबल खेलाडीको हुन्छ । विश्वकपको मैदानमा देशको प्रतिनिधित्व गर्ने मौका हजारौं खेलाडीमध्ये एकाधले मात्र पाएका हुन्छन् । तर, अर्जेन्टिनाका लुइस फिलिप मोन्टी यस्तै भाग्यमानी खेलाडी हुन् । उनले विश्वकपमा लगातार दुई फरक देशबाट खेल्ने सौभाग्य पाएका थिए ।
मोन्टीले सन् १९३० मा उरुग्वेमा आयोजना भएको पहिलो विश्वकपमा अर्जेन्टिनाबाट खेलेका थिए । दमदार एट्याकिङ मिडफिल्डर मोन्टीको प्रदर्शनमा अर्जेन्टिना पहिलो विश्वकपको फाइनलमा पुगेको थियो । तर, फाइनलमा आयोजक उरुग्वेसँग अर्जेन्टिना ४-२ गोलले पराजित हुन पुग्यो । अर्जेन्टिनी राष्ट्रिय टोलीबाट ओलम्पिक खेलकुदको समेत स्वाद चाखेका उनै मोन्टीले सन् १९३४ को दोस्रो विश्वकपमा भने इटालीबाट खेल्ने सौभाग्य पाए ।
मोन्टीको ऐतिहासिक जन्मस्थल रोमांगा इटालीमा गाभिएपछि उनी इटालीका खेलाडी बने । फुटबलमा मोन्टीको आक्रामक र कलात्मक क्षमतालाई त्यति बेला मोटोडो सिस्टमको उममासमेत दिइएको थियो । उनै मोन्टी प्रेरित इटालीले दोस्रो विश्वकपको उपाधि नै जित्यो ।
मोन्टीको टोली इटालीले दोस्रो विश्वकपको फाइनलमा चेकोस्लोभाकियालाई २-१ गोलले हराउँदै उपाधि चुमेको थियो । सन् १९८३ मा ८२ वर्षको उमेरमा निधन भएका मोन्टीले अर्जेन्टिनाका लागि खेलेका १६ खेलमा पाँच गोल र इटालीका लागि खेलेका १८ खेलमा एक गोल गरेका थिए ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)