नेपालीमा एउटा उखान छ, ‘हुने बिरुवाको चिल्लो पात’ । यही उखान लागू हुन्छ, १२ वर्षीया रफिका अवालेमा । सफल फुटबल खेलाडी बन्न चाहने रफिकाको ‘फुटबल कला’ गज्जबको छ । उनी बललाई ‘स्विङ’ गर्न र ‘बाइसिकल किक’ हान्न खप्पिस छिन् ।
ललितपुर भैंसेपाटीकी रफिका फुटबल भनेपछि हुरुक्क हुन्छिन् । सानैदेखि फुटबल ‘क्रेजी’ रफिकालाई सफल खेलाडी बनाउन परिवारले पनि सहयोग गरिरहेका छन् । उनको इच्छालाई पूरा गर्न परिवारले तन, मन, धनले सघाइरहेको छ ।
सानैदेखि फुटबलप्रति विशेष चाह राख्ने रफिका तीन वर्षअघि जुनियर फुटबल एकेडेमीमा पुगिन् । एकेडेमीमा पुगेपछि उनको फुटबलप्रतिको मोह अझ बढ्न पुग्यो । एकेडेमीमा उनले निखारिने मौका पाइन् । सुरुमा फुटबलका केही ‘टेक्निक’ सिक्न एकेडेमी पुगेकी रफिका अहिले सफल खेलाडी बन्ने ध्याउन्नमा छिन् ।
सुरुमा फुटबलका केही ‘टेक्निक’ सिक्न एकेडेमी पुगेकी रफिका अहिले सफल खेलाडी बन्ने ध्याउन्नमा छिन् ।
अखिल नेपाल फुटबल संघ (एन्फा) एकेडेमीका पहिलो ब्याचका खेलाडी प्रज्वलप्रताप क्षत्रीले सञ्चालन गर्दै आएका जुनियर फुटबल एकेडेमीमा रफिकाले आफ्नो कलालाई निखार्ने अवसर पाएकी थिइन् । उनले आफ्नै उमेरसमूहका छात्रसँगै फुटबल खेल्न थालिन् । तर, किक हान्न थालेको छोटो अवधिमै उनी आफ्ना छात्र साथीभन्दा अब्बल सावित भइन् । कोचले सिकाएको हरेक ‘स्टेप’लाई नियाल्ने र त्यसलाई तत्कालै अनुसरण गर्ने बानीले उनी अरूभन्दा विशेष बनिन् ।
जुनियर फुटबल एकेडेमीले हरेक शनिबार र आइतबार तथा अन्य सार्वजनिक बिदाका दिन साना बालबालिकालाई लक्षित गर्दै फुटबल सिकाउँदै आएको छ । बालुवाटारको एक्सेल फुटसलमा हुने ट्रेनिङमा रफिका भैंसेपाटीबाट पुग्ने गर्थिन् । छोरीको फुटबलप्रतिको लगाव देखेर राज अवाले आफैं छोरी लिएर बालुवाटार पुग्थे । दुई घन्टासम्म छोरीको खेल नियालेर बस्थे र ट्रेनिङ सकिएपछि छोरीलाई लिएर घर फर्कन्थे ।
आईडीएल मोडल स्कुल, धोबीघाटमा कक्षा ७ मा अध्ययनरत रफिका भर्खर १२ वर्षकी भइन् । जुनियर फुटबल एकेडेमीमा तीन वर्ष बिताएकी उनी अहिले विभागीय टोली त्रिभुवन आर्मी क्लबमा ट्रेनिङ गर्छिन् । डेढ महिना नेपाल पुलिस क्लबका महिला खेलाडीसँग ट्रेनिङ गरेकी रफिका अहिले आर्मीको सिनियर खेलाडीसँगै फुटबल कला सिक्दै आएकी छन् । उनी हरेक दिन ट्रेनिङमा सहभागी हुन्छिन् ।
सानै उमेरकी रफिकाको ‘स्किल’ देख्नेहरू भने चकित पर्छन् । सिनियर खेलाडीले गर्न नसक्ने स्किल उनले सरल रूपमा गर्छिन् । त्यही कारण जहाँ गए पनि रफिकाले सबैबाट तारिफ पाउने गरेको उनका बुवा राज अवाले बताउँछन् । ‘पुलिसमा ट्रेनिङ गर्दा पनि त्यहाँका गुरुले राम्रो छ भन्नुभएको थियो । आर्मीका प्रशिक्षक किशोर केसीले पनि फिजिकल रूपमा कमजोर भए पनि स्किल भने उत्कृष्ट रहेको बताउँदै आउनुभएको छ,’ अवालेले भने ।
जुनियर फुटबल एकेडेमीका सञ्चालक तथा प्रमुख प्रशिक्षक प्रज्वलप्रताप क्षत्री रफिकाको जिज्ञासु स्वभावका कारण सानै उमेरमा धेरै ‘स्किल’ सिकेको बताउँछन् । ‘रफिका सानैदेखि जिज्ञासु थिइन् । एक पटक सिकाएको कुरा टपक्क टिपिहाल्ने क्षमता उनमा छ’ प्रशिक्षक क्षत्री भन्छन् । यसका साथै दुवै खुट्टा चलाउन सक्ने र ‘स्कोरिङ पावर’ भएकाले राष्ट्रिय टोलीको जर्सीमा देखिन सक्ने क्षत्री बताउँछन् ।
रफिका ट्रेनिङमा मात्र उत्कृष्ट छैनन् । फुटबलमा प्रतियोगितामा पनि उनले आफूलाई अब्बल सावित गर्दै आएकी छन् । उनी जुनियर फुटबल एकेडेमीको फुटबल फेस्टिभलमा उत्कृष्ट खेलाडी चुनिइन् । यसैगरी विभिन्न फुटसल प्रतियोगितामा पनि सहभागी भएर पुरस्कार जित्दै आएकी छन् । विद्यालयमा हुने अतिरिक्त क्रियाकलापमा पनि उनी कहिले छुटाउँदिनन् । हरेक पटक सहभागी भएर पुरस्कार जित्दै आएकी छन् ।
रफिका खेलकुदसँगै पढाइमा पनि अब्बल छिन् । ‘कक्षामा पहिलो, दोस्रो नभए पनि पढाइमा राम्रै गरिरहेकी छ । पढाइ र खेलकुद दुवैमा उत्तिकै मेहनत गरिरहेकी छ’ बुवा राज अवाले भन्छन्, ‘पढाइ नै बिग्रिने गरी खेल्न दिएका छैनौं ।’ रफिका पनि पढाइ बिग्रिने गरी नखेलेको बताउँछिन् । ‘हाम्रो मुख्य काम पढाइ हो । पढाइ नै बिग्रिने गरेर खेल्नु पनि राम्रो होइन,’ रफिका भन्छिन् । उनले खेलकुद र पढाइ दुवैलाई व्यवस्थापन गर्दै आइरहेको राज अवाले बताउँछन् ।
फुर्सदको समयमा घरको कोठामा होस् या आँगनमा रफिका फुटबलसँगै रमाइरहेकी हुन्छिन् । कोठामै फुटबल खेलेर धेरै सामान फुटाएकी रफिकाका लागि घरको कम्पाउन्डमै सानो मैदान बनाइएको छ । उनी फुर्सदको समयमा त्यहीँ रमाउँछिन् ।
रफिकाको लक्ष्य पनि कुशल खेलाडी बन्नेछ । यही लक्ष्य पूरा गर्न उनी हरेक दिन मेहनत गरिरहेकी छन् । उनले आर्मीका सिनियर खेलाडीसँगै वार्मअप गर्छिन् । उनीहरू जत्तिकै दौडिन्छिन् ।
अहिले सारा विश्व विश्वकप फुटबलमा डुबेको छ । फुटबल भनेपछि हुरुक्क हुने रफिका पनि विश्वकपमा चासो राख्दै आएकी छन् । उनले जर्मनीलाई ‘सपोर्ट’ गर्दैछिन् । त्यही कारण उनी साबिक विजेता जर्मनीको ‘जर्सी’मा देखिने गर्छिन् ।
प्रतिक्रिया दिनुहोस !
