भक्तपुर : भक्तपुरमा श्रीमानले सुतिरहेकी श्रीमतीलाई बन्चरोले प्रहार गरी हत्या गरेका छन्। श्रीमतीलाई बञ्चरो प्रहार गर्ने श्रीमान घटनालगत्तै फरार रहेका छन्।
महानगरीय प्रहरी परिसर भक्तपुरका अनुसार भक्तपुरको चाँगुनारायण नपा ७ वागेश्वरीमा डेरा गरी बस्ने २९ वर्षीय उमेश माझीले आफ्नी श्रीमती सलेना माझीलाई गएराती सुतिरहेको अवस्थामा बञ्चरो प्रहार गरेका हुन्।
भोजपुरको अरुण गाउँपालिका ४ चरब्दी घर भएका उमेशले सलेनाको टाउकोमा बञ्चरो प्रहार गरेको परिसरका प्रवक्ता प्रहरी नायब उपरीक्षक कृष्ण प्रसाईंले जानकारी दिए।
उनका अनुसार टाउकोमा बञ्चरो प्रहारबाट घाइते भएकी सलेनालाई उपचारको लागि भक्तपुर अस्पताल लगिएको थियो। भक्तपुर अस्पतालले थप उपचारको लागि न्यूरो अस्पताल बाँसबारी काठमाडौं रिफर गरेको थियो। न्यूरो अस्पतालमा उपचारको क्रममा शुक्रबार बिहान उनको मृत्यु भएको प्रवक्ता प्रसाईंले जानकारी दिए।
उनका अनुसार घटना गराएर फरार उमेशको खोजी कार्य तीव्र पारिएको छ। साथै घटनाबारे थप अनुसन्धान कार्य जारी छ। परिसरका अनुसार फरार उमेश माझीको हुलिया कालो वर्णको, निलो पाइन्ट, निलो टीसर्ट र रातो चप्पल लगाएको छ।
प्रतिक्रिया दिनुहोस !
