बढी सवारी दुर्घटना चितवनमा
भरतपुर : प्रदेश ३ मा काठमाडौं, भक्तपुर र ललितपुरबाहेक सबैभन्दा बढी सवारी दुर्घटना चितवन जिल्लामा भएको पाइएको छ । मध्यक्षेत्रीय ट्राफिक प्रहरी कार्यालयको तथ्यांकअनुसार चालु आर्थिक वर्षको वैशाख मसान्तसम्म चितवन जिल्लामा २ सय २३ वटा सवारी दुर्घटना हुँदा १०५ जनाको मृत्यु भएको छ । दुर्घटनामा परी घाइते हुनेको संख्या ४ सय ४५ रहेको तथ्यांकले देखाएको छ।
दोस्रोमा धादिङ जिल्ला रहेको मध्य क्षेत्रीय ट्राफिक प्रहरी कार्यालय पथलैया बाराका प्रहरी उपरीक्षक किरण बज्राचार्यले जानकारी दिए । धादिङमा भएको दुर्घटनामा १ सय ४ जनाको मृत्यु भएको छ भने ४ सय ४२ जना घाइते भएका छन् । यस्तै, यो आर्थिक वर्षको तथ्यांकलाई केलाउँदा तेस्रो नम्बरमा मकवानपुरमा ६० वटा दुर्घटना भएका छन् । जसमा ५० जनाको मृत्यु भएको छ भने ७७ जना घाइते भएको प्रहरी उपरीक्षक बज्राचार्यले जानकारी दिए ।
३ नम्बर प्रदेशमा सबैभन्दा कम दुर्घटना रसुवामा भएको देखिन्छ । रसुवामा जम्मा २ वटा मात्रै दुर्घटना भएको र १ जनाको मृत्यु भएको र दुई जना घाइते भएको तथ्यांकमा उल्लेख छ । यसरी हेर्दा काठमाडौं, भक्तपुर र ललितपुरबाहेक १० वटा जिल्लाको तथ्यांक हेर्दा ५ सय ९८ वटा दुर्घटना भएकोमा ४ सय ५ जनाले ज्यान गुमाएका छन् भने एक हजार २ सय ८८ जना घाइते भएका छन् ।
देशभरकै तथ्यांक हेर्दा यो आर्थिक वर्षको वैशाख मसान्तसम्म ९ हजार ५० वटा सवारी दुर्घटना हुँदा दुई हजार ९७ जनाको मृत्यु भएको छ भने १० हजार २ सय ३३ जना घाइते भएका छन् । सबैभन्दा बढी ट्र्याक्टर, टिपर, ट्रक तथा मोटरसाइकल दुर्घटनामा पर्ने गरेको ट्राफिक प्रहरीले जनाएको छ । बिहीबार भरतपुरमा भएको सडक सभ्यता अभिवृद्धि तथा सवारी दुर्घटना न्यूनीकरणसम्बन्धी एकदिवसीय ट्राफिक सम्मेलनमा मध्य क्षेत्रीय ट्राफिक प्रहरी कार्यालय पथलैयाले उक्त तथ्यांक सार्वजनिक गरेको हो।