भक्तपुर : भक्तपुरको चाँगुनारायण नगरपालिकामा पदयात्रा गर्ने क्रममा आइतबार एक विदेशी महिलाको मृत्यु गएको छ। चाँगुनारायण नगरपालिका ५ तेलकोट हुँदै चाँगुनारायण मन्दिरतर्फ पदयात्रा गर्दै गरेकी ७२ वर्षीया स्पेनिस नागरिक मर्सिडिज मर्टको मृत्यु भएको हो।
महानगरीय प्रहरी परिसर भक्तपुरका अनुसार चाँगुनारायणको तेलकोट भई त्रिशुल डाँडा हुँदै चाँगुनारायण मन्दिर जाने ट्रेकिङ रुटमा हिँड्दै जाने क्रममा मर्ट अचानक बेहोस भई लड्न पुगेकी थिइन्।
लडेर घाइते भएकी उनलाई भक्तपुर अस्पताल लगिएकोमा उपचारको क्रममा चिकित्सकहरुले मृत घोषणा गरेको परिसरका प्रहरी निरीक्षक सुशीलकुमार पाण्डेले जानकारी दिए। मृतक मर्ट नेपालको १५ दिने भ्रमणमा आएका थिए।
मृतक मर्टको शवको शल्य परीक्षण गर्न काठमाडौंको महाराजगञ्जस्थित त्रिवि शिक्षण अस्पताल पठाइएको परिसरले जनाएको छ। परिसरका अनुसार घटनाबारे थप अनुसन्धान भइरहेको छ।
प्रतिक्रिया दिनुहोस !
