कसरी किन्ने विश्वकपको टिकट ? एक घण्टामै बिके एक लाख २० हजार टिकट
जेठ २७, २०७५ आइतबार २१:४३:०
मस्को: रूसमा हुन लागेको विश्वकप फुटबलका लागि शनिवार फिफाले अतिरिक्त टिकट जारी गरेको थियो । फिफाले टिकट जारी गरेको एक घण्टामा एक लाख २० हजार टिकट बिकेका छन् ।
अब केही राम्रा खेलको मात्रै अतिरिक्त टिकट बाँकी रहेको छ । फुटबल प्रशंसकलार्इ टिकट उपलब्ध रहेको जानकारी फिफा डटकम/टिकट्स वेबसाइट यातायात लाइट जस्तो प्रणालीबाट दिइनेछ । जहाँ १५ जुलाईसम्म टिकट बेचिनेछ ।
विश्वकपका लागि टिकट बिक्री शुरू भएपछि विश्वभरका फुटबल प्रशंसकका लागि २५ लाख भन्दा धेरै टिकट जारी गरिसकिएको छ । अहिलेसम्म टिकट किन्न नसकेकका फुटबल प्रेमीको आशा अझै पनि मरिसकेको छैन । वेबसाइटमा टिकटको पुन:बिक्रीको सम्भावना छ । विश्वकपको भिडन्त १४ जुनबाट सुरू हुँदैछ ।
किनेको टिकट पुन: बिक्रीका लागि फिफाडटकम/टिकट्स वेबसाइट अलग्गै एउटा प्लेटफर्म बनाइएको छ । जसमार्फत टिकटधनीले फिफाको नियम अनुसार त्यसमा दर्ता भएको नाम परिवर्तन गर्न सक्नेछन् या बेच्न सक्नेछन् । फिफाका अनुसार विश्वकपको टिकटका लागि फिफाडटकम/ टिकट्स एकमात्रै आधिकारिक र वैध वेबसाइट हो ।
फिफाले टिकटको अवैध बिक्री र वितरणलार्इ गम्भीर समस्या मान्ने गरेको छ । उसले अनधिकृत टिकट विक्री रोक्न धेरै देशका उपभोक्ता संरक्षण एजेन्सीसहित स्थानीय अधिकारीको सहयोग लिने गरेको छ । जसले अनधिकृत टिकट बिक्री रोक्नेप्रयास गरिरहेका छन् । यसैबीच फिफाले टिकट बेच्नेवाला कम्पनी वायागोगोविरूद्ध ४ जुनमा आपराधिक उजुरी दर्ता गरेको छ ।
प्रतिक्रिया दिनुहोस !
