विश्वकप फुटबलको इतिहासमा इङ्ल्यान्डको नाममा एउटा गजबको कीर्तिमान जोडिएको छ । तीनवटा विश्वकपको कुनै पनि खेलको नियमित समय (९० मिनेट) मा पराजित नभई उपाधि होडबाट बाहिरिने इङ्ल्यान्ड एकमात्र राष्ट्र हो । ती तीनवटै विश्वकपमा इङ्ल्यान्ड या अतिरिक्त समयमा या त पेनाल्टी सुटआउटमा पराजित भएको थियो ।
सन् १९८२ को विश्वकपको समूहगत चरणमा इङ्ल्यान्डले तीनवटै खेल नियमित समयमै जित्यो । दोस्रो चरणमा भने दुईवटै खेलमा गोलरहित बराबरीमा रोकिएपछि इङ्ल्यान्ड उपाधि होडबाट बाहिरियो ।
यसैगरी सन् १९९० को विश्वकपको प्रारम्भिक चरणमा दुई खेलमा बराबरी र एक खेलमा जितको नतिजा निकाल्दै इङ्ल्यान्ड समूह विजेता बन्यो । अन्तिम १६ टोलीबीचको भिडन्तमा इङ्ल्यान्डले बेल्जियमलाई अतिरिक्त समयमा १-० गोलले हरायो ।
सेमिफाइनल खेलमा भने पश्चिम जर्मनीसँग पेनाल्टी सुटआउटमा ४-३ गोलले पराजित हुँदै इङ्ल्यान्ड उपाधि होडबाट बाहिरियो । यद्यपि, तेस्रो स्थानका लागि भएको खेलमा इटालीले इङ्ल्यान्डलाई नियमित ९० मिटको समयै २-१ गोलले हराएको थियो । तर, यो खेलअघि नै इङ्ल्यान्ड उपाधि होडबाट भने बाहिरिइसकेको थियो ।
यसैगरी सन् २००६ को विश्वकपमा पनि इङ्ल्यान्ड नियमित ९० मिनेटको समयमा एउटा खेल पनि नहारी उपाधि होडबाट बाहिरियो । उक्त विश्वकपको प्रारम्भिक चरणमा दुई खेलमा जित र एक खेलमा बराबरीको नतिजा निकालेको इङ्ल्यान्ड समूह विजेता बन्यो ।
अन्तिम १६ टोलीबीचको भिडन्तमा इङ्ल्यान्डले इक्वेडरलाई १-० गोलले हरायो । तर, इङ्ल्यान्ड क्वार्टरफाइनल खेलमा भने पोर्चुगलसँग पेनाल्टी सुटआउटमा ३-१ गोलले पराजित हुन पुग्यो । त्यतिबेला पनि निर्धारित र अतिरिक्त समयको खेल १-१ गोलको बराबरीमा सकिएको थियो ।
प्रतिक्रिया दिनुहोस !
