गोरखा : सरकारले बजेट भाषण गरेको दिनदेखि नै गोरखाका विभिन्न बजारमा दैनिक उपभोग्य बस्तुको मूल्यवृद्धि भएको छ । जेठ १५ गतेदेखि कम्पनीबाट मूल्यवृद्धि भएर सामान आएकाले मूल्यवृद्धि गर्न बाध्य भएको स्थानीय व्यापारीको भनाइ छ । ‘नयाँ उत्पादन भएको सामानमा मात्र होइन, कम्पनीले स्टक सामानमा समेत मूल्य बढाएर पठाएको छ’, वाइवाइ चाउचाउका डिलर दण्डपाणि कट्टेलले भने, ‘प्रतिकार्टुन १५ रुपैयाँ अन्तशुल्क तिथ्र्यौं । अहिले प्रतिकार्टुन भ्याट बाहेक ३३ रुपैयाँ तिर्नुपर्छ ।’ पाकेटमा पुरानै दरको मूल्य अंकित भए पनि कम्पनीले बिलमा मूल्य बढाएर पठाएको उनले बताए ।
बजेटमा उल्लेख कर साउनदेखि कार्यान्वयन हुन्छ, तर कम्पनी र व्यापारीले अहिलेदेखि नै मूल्य बढाएका हुन् । ‘कम्पनीले अनावश्यक मूल्य बढाएकाले हामीले पनि बढाउन बाध्य भएका हौं’, अर्का व्यापारी मनकाजी श्रेष्ठले भने, ‘स्टक सामानमा पनि किन मूल्य र कर बढाउनु प¥यो ? सरकारले यस बारेमा गम्भीर रुपले कुरा उठाइदिनुपर्छ ।’ बढेको मूल्यमा खुद्रा पसलेले सामान लैजान आनाकानी गरेर आफूलाई हैरान पारेको उनको भनाइ छ ।
जिल्ला अनुगमन टोलीले गरेको बजार अनुगमनमा व्यापारीको बेमौसमी मूल्यवृद्धिले उपभोक्ता र साना व्यापारी दुबैलाई हैरान पारेको जनाएको छ । जिल्ला अनुगमन समितिले गोरखा सदरमुकाममा बजार अनुगमन गरेको थियो । अनुगमनमा कालीमाटी टोलको मसला पसलमा म्याद नाघेका तेल, तिहारका लागि बनाइएको भाइ मसला, पापडजस्ता सामान प्रसस्त भेटिएको अनुगमन टोलीका गौतम भण्डारीले जानकारी दिए । मूल्य सूची नराखिएका, एउटै सामानको मूल्य पसलमा फरक भेटिएको उनले बताए ।
प्रतिक्रिया दिनुहोस !
