जनकपुरधाम : प्रदेश २ मा ३ हजार प्रदेश प्रहरी भर्ना गर्ने तयारी सरकारले गरेको छ । स्रोतसाधनअनुसार प्रदेश प्रहरी भर्ना गर्ने तयारी रहेको आन्तरिक मामिला तथा कानुनमन्त्री ज्ञानेन्द्र यादवले बताएका छन् ।
उनका अनुसार प्रदेश प्रहरीको भर्नापश्चात् तिनको तालिम र व्यवस्थापनको काम प्रदेश सरकारले नै गर्नेछ । ‘हामीले प्रदेश प्रहरीका लागि तालिम केन्द्र स्थापना प्रक्रिया अघि बढाएका छौं’, उनले भने, ‘त्यसका लागि जग्गा छनोट भइसकेको छ । सम्भवतः यसै आर्थिक वर्षमा तालिम केन्द्र निर्माण कार्य सम्पन्न हुनेछ ।’
प्रदेश प्रहरी सञ्चालनका लागि मन्त्रिपरिषद्को बिहीबार बसेको बैठकले प्रदेश प्रहरी गठनसम्बन्धी विधेयक अघि बढाउने निर्णयसमेत गरेको उनले बताए । ‘हामीले संघीय प्रहरी ऐनसँग नबाझिने गरी नियमावली निर्माण गर्नेछौं’, उनले भने । सोही नियमावलीअनुसार प्रदेश प्रहरी भर्नाको मापदण्ड निर्धारणदेखि सरुवा–बढुवा गरिने विधेयकमा उल्लेख छ । विज्ञको सल्लाह लिएर बनाइएको विधेयक प्रदेशसभाबाट पारित भएपछि प्रदेश प्रहरी भर्नाका लागि अध्ययन समितिसमेत गठन गरिने भएको छ ।
विधेयक मस्यौदामा ४५ प्रतिशत आरक्षणको व्यवस्था प्रस्ताव गरिएको छ । आरक्षणमा महिलालाई प्राथमिकता दिइएको छ । ५० प्रतिशत महिला, १० प्रतिशत मधेसी र त्यसपछि दलित, आदिवासी जनजाति, मुस्लिम र थारू रहने जनाइएको छ ।
संघीय प्रहरीसँग समन्वय गरी प्रदेश प्रहरीले कार्यसम्पादन गर्ने हुनाले संघबाट खटाइएका अधिकारी नै प्रदेश प्रहरी प्रमुखका रूपमा रहनेछन् । हाल प्रदेशमा प्रदेश प्रहरी कार्यालय स्थापना भई डीआईजीले प्रमुखका रूपमा कार्यभार सम्हालिरहेका छन् । प्रदेश प्रहरी परिचालन गर्ने सम्पूर्ण अधिकार प्रदेशको आन्तरिक मामिला तथा कानुन मन्त्रालयलाई हुने विधेयक मस्यौदामा उल्लेख छ ।
प्रतिक्रिया दिनुहोस !
