मस्को : रुस विश्वकपको समूह ‘बी’अन्तर्गत महत्वपूर्ण खेलमा शुक्रबार राति सन् २०१० को विजेता स्पेन र सन् २०१६ को युरोकप विजेता पोर्चुगल भिड्दै छन् । यी दुई युरोपेली टोलीबीचको प्रतिस्पर्धा रुस विश्वकपमा समूहगत चरणको बहुप्रतीक्षित खेल हो । स्पेन र पोर्चुगल दुवै रुस विश्वकप फुटबलका सशक्त टोली हुन् । स्पेनसँग युरोपकै उत्कृष्ट मानिएको घरेलु स्पेनिस ला लिगामा स्थापित खेलाडीको साथ छ ।
सन् २०१६ मा फ्रान्समा भएको युरोकप फुटबलको उपाधि जितेको पोर्चुगलको टोली पनि निकै सशक्त देखिएको छ । पोर्चुगलले आफू स्टार खेलाडी रोनाल्डोमाथि मात्र निर्भर नरहेको सन्देश युरोकपको उपाधि जितेर दिइसकेको छ । पोर्चुगलले रोनाल्डोबिना नै फाइनलमा आयोजक फ्रान्सलाई पराजित गर्दै उपाधि जितेको थियो । त्यही समयबाट राष्ट्रिय टोलीमा उदाएका पोर्चुगलका युवा खेलाडी रुस विश्वकपसम्म आइपुग्दा अझ खारिएका छन् ।
यी दुवै टोली आफ्नो पहिलो खेलमा जितसहित २१औं विश्वकपमा सुखद सुरुआत गर्न चाहन्छन् । स्पेनलाई अघिल्लो संस्करणमा समूहगत चरणबाटै बाहिरिनु परेको पीडा पनि छ । सन् २०१० मा उपाधि जितेको स्पेन त्यसको चार वर्षपछि ब्राजिलमा भएको विश्वकपमा समूहगत चरणबाटै बाहिरिएको थियो । पोर्चुगललाई रोनाल्डोको नेतृत्वमा विश्वकपको पहिलो उपाधि जित्ने लालसा पनि छ।
त्यसबाहेक यी दुई टोलीबीच समूह ‘बी’बाट विजेता बन्दै प्रतियोगिताको अन्तिम १६ मा पुग्ने दबाबपूर्ण अवस्था पनि छ । त्यही कारण यी दुई टोलीबीचको खेल राम्रा खेलाडीका कारणले मात्रै होइन, अन्य कारणले पनि रोमाञ्चक हुने पक्का छ । स्पेन र पोर्चुगलले रुस विश्वकपको तयारीस्वरूप खेलेका खेलमा आफूलाई उच्च लयमा राखेका छन् ।
स्पेन पछिल्लो २० महिनायता आफ्नो कुनै पनि खेलमा पराजित भएको छैन । यो अवधिमा खेलिएका २० खेलमध्ये स्पेनले १४ खेलमा जित हात पारेको छ । यसैगरी पोर्चुगलले पनि पछिल्लो २० महिनायता खेलेको २५ खेलमध्ये केवल चार खेलमा पराजय बेहोरेको छ । पोर्चुगलले १७ खेलमा जित हात पारेको छ ।
यी दुई टोलीबीच विश्वकप फुटबलमा भने सन् २०१० मा एकपटक मात्र प्रतिस्पर्धा भएको छ । उक्त खेलमा स्पेन १-० गोलले विजयी भएको थियो । त्यसबाहेक समग्रमा भने यी दुई टोलीबीच ३६ पटक प्रतिस्पर्धा हुँदा स्पेनले सर्वाधिक १८ पटक जितेको छ । पोर्चुगलले भने ६ पटक मात्र जित हात पारेको छ । पोर्चुगल युरोपेली छनोट प्रतियोगिताको समूह ‘बी’ र स्पेन समूह ‘जी’को विजेता बन्दै रुस विश्वकपका लागि छनोट भएका टोली हुन् ।
विगतमा यी दुई
कुल खेल :३६
स्पेन विजयी :१८
पोर्चुगल विजयी :६
बराबरी :१२
स्पेन
विश्वकप सहभागिता :१५औं पटक
उपलब्धि :उपाधि (सन् २०१०)
फिफा वरीयता :१०
पोर्चुगल
विश्वकप सहभागिता :सातौंपटक
उपलब्धि :तेस्रो स्थान (सन् १९६६)
फिफा वरीयता :४
प्रभाव पार्नसक्ने खेलाडी
क्रिस्टियानो रोनाल्डो (पोर्चुगल)
पछिल्लो पुस्ताका महान् फुटबलरमध्येका एक हुन्, क्रिस्टियानो रोनाल्डो । स्पेनिस क्लब रियल म्याड्रिडबाट व्यावसायिक फुटबल खेल्ने रोनाल्डोले क्लब र राष्ट्रिय टोलीबाट धेरै कीर्तिमान आफ्नो नाममा लेखाएका छन् । अग्रपंक्तिमा सधैं उत्कृष्ट प्रदर्शन गर्ने रोनाल्डो बललाई आफ्नोे इच्छाअनुसार खेलाउन सक्ने क्षमता र छुट्टै खेल्ने शैलीका कारण निकै सफल र चर्चित छन् ।
मैदानमा सधैं आक्रामक रूपमा प्रस्तुत हुने उनी आफ्नो टोलीका लागि गोल मेसिनकै रूपमा प्रस्तुत हुने गर्छन् । रोनाल्डो खुट्टा र हेडिङ दुवैबाट गोल गर्न पनि उत्तिकै खप्पिस फुटबलर हुन् । युरोपेली क्लब फुटबलमा रियल म्याड्रिडको पछिल्लो सफलतामा मुख्य भूमिका निर्वाह गरेका रोनाल्डोले आफ्नो नेतृत्वमा पोर्चुगललाई अहिलेसम्मकै ठूलो उपाधिका रूपमा सन् २०१६ को युरोकप दिलाएका थिए ।
युरोकपमा चोटग्रस्त बनेपछि उनले फाइनल खेल पूरै समय खेल्न त सकेनन् तर टोलीलाई फाइनलसम्म पु¥याउन उनकै भूमिका महŒवपूर्ण रहेको थियो । पोर्चुगिज राष्ट्रिय टोलीबाट सर्वाधिक गोल गर्ने खेलाडीको सूचीमा शीर्ष स्थानमा रहेका रोनाल्डोले एक सय ५० खेलबाट ८१ गोल गरेका छन् । टोलीका कप्तानसमेत रहेका पाँचपटकका फिफा वर्ष खेलाडी रोनाल्डो रुस विश्वकपमा पनि पोर्चुगलका मुख्य हतियार हुन् ।
इङ्लिस प्रिमियर लिग क्लब म्यानचेस्टर युनाइटेडका पूर्वखेलाडी रोनाल्डोको विश्वकपमा यो चौथो सहभागिता हो । उनले यसअघि सन् २००६, सन् २०१० र सन् २०१४ को विश्वकपमा पनि राष्ट्रको प्रतिनिधित्व गरेका थिए । उनले विश्वकपमा हालसम्म तीन गोल गरेका छन् । ३३ वर्षीय रोनाल्डोकै प्रदर्शनले रुस विश्वकपमा पोर्चुगलको भविष्य निर्धारण गर्नेछ ।
आन्दे्रस इनिएस्टा (स्पेन)
आन्दे्रस इनिएस्टा स्पेनिस राष्ट्रिय टोलीको ‘गोल्डेन जेनेरेसन’का महŒवपूर्ण सदस्य हुन् । उनी टोलीको हरेक ठूला सफलतासँग अभिन्न रूपमा जोडिएका छन् । स्पेनले सन् २००८ देखि सन् २०१२ सम्म दुई युरोकप र एउटा विश्वकपको उपाधि जित्दा मिडफिल्डबाट उनै इनिएस्टाले महŒवपूर्ण भूमिका निर्वाह गरेका थिए । स्पेनले सन् २०१० मा दक्षिण अफ्रिकामा भएको विश्वकपको फाइनलमा नेदरल्यान्ड्सलाई १–० ले पराजित गर्दा इनिएस्टाले नै निर्णायक गोल गरेका थिए ।
आफ्नो खेल जीवनको लगभग पूरा समय घरेलु टोली बार्सिलोनाबाट खेलेका उनले रुस विश्वकपपछि राष्ट्रिय टोलीसँगै बार्सिलोनाबाट पनि सन्न्यास लिने बताएका छन् । आफ्नो खेल जीवनकै अन्तिम विश्वकप खेलिरहेकाले पनि यति बेला इनिएस्टा सुखद बिदाइको योजनामा छन् । उनले कल्पना गरेको सुखद बिदाइ रुस विश्वकपको उपाधि जितेर मात्र सम्भव हुनेछ ।
मिडफिल्डबाट खेल्दै आफ्ना स्ट्राइकरलाई गोलका लागि राम्रा अवसर निकाल्न सक्ने क्षमता पनि उनमा छ । यसका अतिरिक्त आफैं पनि गोल गर्न सक्षम इनिएस्टाले उपाधिसहित आफ्नो सुखद बिदाइका लागि विश्वकपमा पूरै क्षमता खर्चनेछन् । उनको त्यही मेहनत रुस विश्वकपमा हेर्नलायक हुनेछ । सन् २००६ मा स्पेनको राष्ट्रिय टोलीमा ‘डेब्यु’ गरेका ३४ वर्षीय इनिएस्टाले त्यसयता एक सय २६ खेल खेल्दै १३ गोल गरेका छन् ।
प्रतिक्रिया दिनुहोस !
