मस्को : विश्व फुटबल महासंघमा आबद्ध दुई सय ११ देशमध्ये ३२ टोलीबीच हुने घम्साघम्सीलाई आफ्नै देशका समर्थकले मन पराउनु स्वाभाविक हो । विश्वकप प्रत्यक्ष हेर्न जहाज, होटल र खेलको टिकट बुकिङ गर्नेको जमात लाखौं छ । विश्वभरका करौडौं मानिक रुसमा बिहीबारदेखि सुरु भएको विश्वकपमा आफ्नो मन परेको देशलाई समर्थन गर्न अहिले तँछाडमछाड गरिरहेका छन् ।
तर, साउदी अरेबियाका एक समर्थक भने आफ्नो देश र खेलाडीलाई समर्थन गर्न हजारौं किलोमिटर साइकल यात्रा गर्दै रुस पुगेको समाचारले अहिले अन्तर्राष्ट्रिय समाचार माध्यममा चर्चा पाएको छ । साउदीका फहाद अल-यह्या रुस विश्वकपमा आफ्नो टोलीलाई समर्थन गर्न रियाददेखि साइकल चढेर मस्को पुगेका छन् । २८ वर्षीय फहादले पाँच हजार एक सय ४५ किलोमिटर दूरीको यात्रा ७५ दिनमा पूरा गरेका थिए ।
यात्राका क्रममा फहाद धेरैपटक बाटोमा चिप्लिएर लड्दा घाइते पनि भए तर उनले आफ्नो यात्रा भने कायमै राखे । उनी चारवटा देश पार गर्दै बुधबार मात्र मस्को पुगेका हुन् । मस्कोमा उनलाई त्यहाँस्थित साउदी अरेबियाको दूतावासका अधिकारीसँगै साउदीका खेलाडी, अफिसियल र साउदी अरेबिया फुटबल संघका अध्यक्ष अदेल इजातले भव्य स्वागत गरेका थिए ।
फहादलाई साउदीका राजकुमारले राष्ट्रिय झन्डा दिएर बिदाइ गरेका थिए । उनले उक्त झन्डा मस्कोस्थित साउदी अरेबियाका राजदूतलाई हस्तान्तरण गरेका थिए ।
मस्कोका उनी राष्ट्रिय टोलीसँग खुसी साट्न पाउँदा झनै उत्साहित देखिए । ‘म साइकल यात्रा गर्न मन पराउने मानिस हुँ । यात्रा गर्दाको कठिनाइलाई मैले मस्कोमा आएर भुलेँ । मैले आफ्नो सपना पूरा गरेको छु । म आफ्नो ‘ग्रिन फाल्कोन्स’ टोलीले जितेको हेर्न आतुर छु’, उनले भने ।
उनी विश्वकप सकिएपछि भने हवाईजहाजबाट स्वदेश फर्कने तयारीमा छन् । रुस विश्वकपमा एसियाबाट प्रतिनिधित्व गरेको साउदीले समूह ‘ए’बाट प्रतिस्पर्धा गर्दैछ । यो समूहमा आयोजक रुस, इजिप्ट र उरुग्वे छन् । उद्घाटन खेलमा आयोजक रुसको सामना गरेको साउदीले दोस्रो खेल असार ६ गते बलियो प्रतिद्वन्द्वी उरुग्वेसँग खेल्नेछ ।
यसैगरी पाँच दिनअघि एक जर्मन समर्थक भने ट्र्याक्टर चढेरै विश्वकप हेर्न रुस पुगेका थिए । ७० वर्षीय जर्मन समर्थक हुबर्ट विर्थ आफ्नो घर जर्मनीको फोझेइमबाटै भिन्टेज १९३६ ट्र्याक्टर चढेर रुस पुगेका हुन् । विश्वकप हेर्न ट्र्याक्टरमा रुस पुग्दा उनलाई सीमामा रुसी अधिकारीहरूले भब्य स्वागत गरेका थिए । रुसी अधिकारीहरूले उनलाई ट्र्याक्टर र उनको सामानका लागि तिर्नुपर्ने करमा समेत छुट दिएका थिए ।
उनी प्रतिघन्टा ३० किलोमिटरको गतिमा दौडने ट्र्याक्टरमा आफ्नो कुकुरसहित मस्को पुगेका हुन् । उनलाई मस्को पुग्न १० दिन लागेको थियो । विर्थले आफ्नो ट्र्याक्टरमै आफू सुत्ने र खाने ठाउँसमेत बनाएका छन् । रुस विश्वकप फुटबलमा विर्थको देश जर्मनी चार वर्षअघि ब्राजिलमा आफूले जितेको उपाधि रक्षा गर्ने प्रयासमा छ । सन् २०१४ को फाइनलमा अर्जेन्टिनालाई १-० गोलले पराजित गर्दै जर्मनीले उपाधि चुमेको थियो ।
प्रतिक्रिया दिनुहोस !
