काठमाडौँः इरानले रसियामा जारी विश्वकप फुटबल प्रतियोगितामा विजयी सुरुवात गरेको छ । खेलको इन्जुरी समयको अन्तिम मिनेटमा मोरक्ककोले आत्मघाती गोल गरेपछि इरानले विजयी सुरुवात गरेको हो ।
इरानको महत्वपूर्ण जितमा मोरक्कोका अजिज बोउहाद्दोजुले खेलको अतिरिक्त समयको पाँचौ मिनेटमा हेडमार्फत् बचाउका लागि बाहिर फाल्न खोजेको बलले जाली चुमेको थियो ।
खेलको सुरुदेखि नै दुवै टिमले आक्रमणका प्रयास गरे पनि पहिलो हाफमा दुवैतर्फबाट गोल हुन सकेन । दोस्रो हाफमा पनि मोरक्कोले इरानमाथि दबाब दिएको थियो ।
६३ प्रतिशत बल पोजिसन रहेको मोरक्कले केही राम्रा अवसर गुमायो भने इरानले पनि काउन्टर एट्याकमा गोलका गतिला अवसर खेर फालेको थियो । तर, इरानले खेलको ९५ औँ मिनेटमा मोरक्को डी एरियाबाट केही पर कर्णर साइडबाट उत्कृष्ट फ्री किकको अवसर पाएको थियो ।
कसले कस्तो खेले ?
| टिम | गोल प्रयास | पासिङ एक्यूरेसी | पास | कति दौडिए | कर्नर | बल पोजिसन |
| मोरक्को | १२ | ८४ प्रतिशत | ४१४ | ९५ किमि | ५ | ६४ प्रतिशत |
| इरान | ८ | ६५ प्रतिशत | १९७ | ९३ किमि | २ | ३६ प्रतिशत |
इरानले प्रहार गरेको फ्री किक बल पोस्टको दिशामा सोझिएपछि मोरक्कोका अजिजले बचाउको प्रयास गरेका थिए । तर बचाउका लागि कर्णरको दिशातर्फ फालेको बल सीधै जाली चुम्न पुगेपछि इरानले सन् १९९८ पछि विश्वकपमा पहिलो जित निकाल्यो ।
सेन्ट पिटर्सबर्ग स्टेडियममा भएको यो खेलमा मोरक्कोका अयुब अल काभी आठौँ मिनेटमा गर्न चुके । उनको बायाँ खुट्टोले हानेको सट गोलपोस्टमा पुगेन । त्यसपछि म्याच रेफ्री सकिर कुनैतले इरानका कप्तान मसुज सोजोईलाई १० औँ मिनेटमा पहेलो कार्ड देखाए ।
३३ औँ मिनेटमा इरानका खेलाडीलाई फल गरेपछि मोरक्कोका करिम अल अहमदीलाई पनि पहेँलो कार्ड देखाइयो । ४२ औँ मिनेटमा ईरानका इब्राहिमीको पासमा स्ट्राइकर सरदार बललाई लिएर गोलपोस्टसम्म पुगे तर मोरक्कोका गोल किपरले उनको कोशिशलाई विफल पारिदिए ।
इरानका जहांबख्सलाई दोस्रो हाफको सुरुवात अर्थात् ४७ औँ मिनेटमा रेफ्रीले पहेँलो कार्डढ देखाए । ६७ औँ मिनेटमा इरानले कप्तान मसूद सोजाईको स्थानमा मेहदी तरेमीलाई मैदानमा बोलायो । ९२ औँ मिनेटमा इरानका करिमलाई पनि पहेँलो कार्ड देखाइयो ।
प्रतिक्रिया दिनुहोस !
