मस्को : प्रत्येक चार वर्षमा आयोजना हुने विश्वकप फुटबल मैदानमा खेलाडीबीच हुने घम्साघम्सीका कारण मात्र चर्चित हुँदैन, विश्वकप फुटबलमा खेलसँगै समर्थकहरूको चर्तिकलाले पनि उत्तिकै चर्चा पाउँछ । रुसमा बिहीबारदेखि सुरु भएको २१औं विश्वकप फुटबलका क्रममा पनि समर्थकका थरीथरीका चर्तिकला समाचारको विषय बन्न थालेका छन् ।
कुनै समर्थक आफ्नो टोलीको खेल हेर्न जर्मनीबाट आयोजक राष्ट्र पुगेका छन् भने कुनै समर्थक टोलीको हौसला बढाउन पाँच हजार किलोमिटरभन्दा बढी दूरी साइकलमा पार गर्दै रुससम्म पुगेका छन् । यस्तोमा घरेलु टोली रुसका समर्थकले पनि आफ्ना खेलाडीको मनोबल बढाउन छुट्टै अभियान चलाएका छन् । रुसका समर्थकले आफ्नोे टोलीको हौसला बढाउन जुँगा बढाउने अभियान थालेका छन् ।
रुसका चर्चित टेलिभिजन कार्यक्रम प्रस्तोता इभान उर्गान्टले विश्वकपमा घरेलु टोलीको हौसला बढाउन ‘जुँगा बढाऊ अभियान’ सुरु गरेका हुन् । उनले आफ्नो टेलिभिजन कार्यक्रममार्फत समर्थकलाई विश्वकप अवधिभर जुँगा बढाउन आह्वान गरेपछि जुँगा बढाउने समर्थकको संख्या बढ्दै गएको छ । महिला समर्थकले समेत नक्कली जुँगा लगाएर यो अभियानमा साथ दिँदै आएका छन् ।
खासगरी यो अभियानलाई रुसी टोलीका प्रशिक्षक स्टानिस्लाभ चेर्चेसोभसँग जोडेर अगाडि बढाइएको हो । आफ्नो समयका चर्चित गोलरक्षक चेर्चेसोभ खेलाडी जीवनदेखि नै आफ्नो जुँगा र कपालको शैलीका लागि चर्चित थिए । चर्चेसोभले तात्कालीन सोभियत संघबाट पनि फुटबल खेलेका थिए । ‘चेर्चेसोभलाई यति बेला हाम्रो समर्थनको आवश्यकता छ, त्यसैले विश्वकप अवधिभर आफ्नो जुँगा बढाएर हामी उनको र राष्ट्रिय टोलीको हौसला बढाऔं’, इभानले आफ्नो कार्यक्रम र सामाजिक सञ्जालबाट समेत समर्थकलाई आग्रह गरेका थिए ।
‘यति बेला विश्वकपको भविष्यवाणी, मौसम, भौतिकशास्त्रको नियम, खेलाडीको प्रदर्शनसमेत प्रशिक्षक चेर्चेसोभको विरुद्घमा छ । यस्तो अवस्थामा हाम्रो अभियानले टोलीको हौसला बढाउन सहयोग पुर्याउने छ’, विश्वकप सुरु हुनुअघि खेलिएका अभ्यास खेलहरूमा रुसले निराशाजनक प्रदर्शन गरेपछि इभानले भनेका थिए । उनको यो अभियानपछि सामाजिक सञ्जालमा समेत जुँगासहितको आफ्नो तस्बिर पोस्ट गर्ने समर्थकको संख्या निकै बढेको समाचारमा उल्लेख छ ।
जारी विश्वकपमा आयोजक रुस फिफा वरीयताको सबैभन्दा तल रहेको राष्ट्र हो । फिफाको पछिल्लो वरीयतामा साउदी अरेबिया पनि रुसलाई उछिन्दै अगाडि बढेको थियो । यद्यपि, विश्वकपको बिहीबार खेलिएको उद्घाटन खेलमा रुसले एसियाली प्रतिद्वन्द्वी साउदी अरेबियालाई ५–० गोलको फराकिलो अन्तरले हराउँदै आफूलाई कमजोर नआँक्न सबै प्रतिद्वन्द्वी र आफ्ना आलोचकलाई समेत कडा चेतावनी दिएको छ । समूह ‘ए’मा रुस र साउदी अरेबियासँगै दुईपटकको विश्वकप विजेता उरुग्वे र इजिप्ट पनि छन् । रुसले आफ्नो दोस्रो खेल जुन १९ मा इजिप्टसँग खेल्नेछ ।
प्रतिक्रिया दिनुहोस !
