पोखरा : फिर्केखोला अतिक्रमण गरेका संरचना भत्काउन डोजर ठिक्क पारिएको थियो । पैदल मार्ग बनाउने गरी अतिक्रमण भत्काउने क्रम सुरूवात गर्न महानगरपालिकाका मेयर मानबहादुर जिसी डाकिएका थिए । जसै डोजर ठिक्क पर्यो, मेयर चालक क्याबिनमा उक्लिए । फरासिला र जोसिला मेयर जिसीले ‘खै खै मैले के गर्नुपर्यो, घुमाउने नै हो त घुमाइदिऊँ’ भन्न के भ्याएका थिए, डोजर घुमिहाल्यो । अन्जानमै मेयरको हातले लिबर गियर समातेपछि निमेषभरमै डोजरको बकेट घुम्यो र भुइँमा बसिरहेका ५ जनालाई लाग्यो । २ जना पत्रकार, एक जना वडा सदस्यसहित ५ जना खोलामा खसिहाले । धन्न कसैको प्राण भने गएन ।
पत्रकारहरु रञ्जन अधिकारी र सन्देश श्रेष्ठ अनि वडा सदस्य गौरी पौडेललाई चोट लाग्यो । सन्देशले आफूलाई सम्हाल्दै रञ्जनकै मोटरसाइकलमा उनलाई लिएर अस्पताल पुर्याए । अलि बढी चोट लागेकी गौरीलाई अस्पताल लगियो । उनको मेट्रोसिटी अस्पतालमा उपचार भइरहेको छ । खोलामै खसे पनि अरु २ जनालाई भने खास चोट लागेको थिएन । पत्रकारद्वय सामान्य उपचारपछि घर फर्के । मेयर जिसीले उद्घाटन गर्दै गरेको फोटो खिच्दै गरेका पत्रकार र स्थानीयलाई स्काभेटरले रेलिङसहित घसारेर खोलाको किनारमा पुर्याएको हो । मेयर जिसीले डोजरको क्याबिनमा चालकबाहेक अरु पनि बसेको र उनीहरुमध्येका एकजनाले अचानक समातिदिँदा डोजर घुमिहालेको प्रतिक्रिया दिएका छन् ।
पोखराको फिर्केखोला किनारमा शुक्रबारदेखि फुट ट्र्याक निर्माण सुरु भएको छ । पोखरा ५ पस्र्याङस्थित फिर्केखोला किनारबाट फुट ट्र्याक निर्माण सुरु भएको हो ।
फुट ट्र्याक निर्माणको पोखरा महानगरपालिकाका मेयर मानबहादुर जिसीले उद्घाटन गरे । उद्घाटन कार्यक्रममा बोल्दै मेयर मानबहादुर जिसीले प्राकृतिक स्रोत र साधनको संरक्षणसँगै विकास गर्ने उद्देश्यले फिर्केखोला र बुलौंदी खोलाको दुबै किनारमा ५÷५ मिटर दायाँबायाँ फुटपाथ बनाउने कार्य सुरु भएको घोषणा गरे । फिर्केखोला र बुलौदी खोलाको ६ किलोमिटर क्षेत्रको दायाँबायाँ सरकारी, विभिन्न संघ संस्था र निजी गरी २ सय ११ संरचना रहेको मेयर जिसीले बताए । मापदण्डविपरीतका संरचना भत्काएर पोखरालाई दीर्घकालीन रुपमा विकास गर्न योजनाअघि बढेको उनले सुनाए ।
पहिलो चरणमा ३ सय मिटर ट्र्याक बनाइने पोखरा ५ का वडाध्यक्ष धनबहादुर नेपालीले बताए । पहिलो चरणमा १ करोड ७२ लाखमा तीन सय मिटर पैदलमार्ग बन्न लागेको हो । फिर्केखोला अतिक्रमण गरेर खोलामाथि समेत घरटहरा बन्ने क्रम बढेपछि पोखरा महानगरपालिकाले खोलाको जमिनको खोजीका लागि फागुन २९ गतेदेखि खोलाको नापजाँच र रेखांकन सुरु गरेको थियो ।
खोलाको नापजाँचका क्रममा खोला मिचेर घर, भान्छा घर, निजी पानी टंकी, सेप्टिक ट्यांक, शौचालय, घर कम्पाउन्डसमेत गरी २ सयभन्दा बढी संरचना बनाएको पाइएको पोखरा महानगरपालिकाका इन्जिनियर महेन्द्र गोदारले जानकारी दिए । यसरी खोलाको मापदण्ड मिचेर संरचना बनाउनेमा सरकारी कार्यालय, कलेज, विद्यालय, विभिन्न समुदायका समाज घर, क्लबका भवन, निजी घर, पोल्टी फारम समेत छन् । नापजाँचका क्रममा पूरा घर नै खोलामाथि समेत बनाइएको पाइएको छ । फिर्केखोला किनारमा मापदण्डविपरीत सुकुम्बासीले समेत घर बनाएका छन् । त्यो संख्या ३३ घर रहेको महानगरपालिकाले खोलाको नापजाँचपछि तयार पारेको रिपोर्टमा उल्लेख छ ।
खोलाको वरपर हिँडडुल गर्न सहज होस् भन्ने उद्देश्यले खोलाको संरक्षण गरी खोला वरपर हरियाली बनाइ फुटपाथ निर्माण गर्ने योजना अनुसार काम अघि बढेको हो । फिर्के खोला पोखरा १८ अधेरीकुनावाट फेवाताल सम्म ८ किलोमिटर लम्बाइ छ । फेवाताल किनारमा ३४ मिटर चाक्लो रहेको फिर्केखोला कम्तीमा ५ मिटरसम्म साँघुरो रहेको महानगरपालिकाका इन्जिनियर महेन्द्र गोदारले जानकारी दिए ।
प्रतिक्रिया दिनुहोस !
