मस्को : कोलम्बिया सन् २००२ देखि सन् २०१० सम्म भएका तीनवटा विश्वकपको छनोट प्रतियोगितामै असफल भयो । त्यसैले १६ वर्षपछि फुटबलको सबैभन्दा ठूलो प्रतियोगितामा फर्कंदा सन् २०१४ मा कोलम्बियालाई ‘अन्डर डग’ टोली मानिएको थियो । त्यसको अर्थ थियो, कोलम्बिया विश्वकपमा समूहगत चरणका अधिकांश खेलमा पराजित हुनेछ ।
तर, कोलम्बियाले चार वर्षअघिको ब्राजिल विश्वकपमा पहिलो खेलबाटै जादु देखाउन सुरु गर्यो । ‘अन्डर डग’बाट ‘डार्क हर्स’ टोलीको छवि बनाउँदै कोलम्बिया प्रतियोगिताको क्वार्टरफाइनलसम्मै पुग्यो र अन्त्यमा ३२ टोली सहभागी प्रतियोगितामा पाँचौं बन्यो । टोलीको यो सफलताको पछाडि एउटै कुरा, युवा स्ट्राइकर जेम्स रोड्रिगेजको प्रदर्शन जोडिएको थियो ।
रोड्रिगेजले प्रतियोगितामा यस्तो प्रदर्शन गरे कि आफ्ना समर्थक मात्रै होइन, विपक्षी समर्थक र खेलाडी पनि उनको प्रशंसा गर्न बाध्य भए । कोलम्बिया क्वार्टरफाइनलमा ब्राजिलसँग पराजित हुँदा ब्राजिलियन रक्षक डेभिड लुइजले रोड्रिगेजको हात समातेर स्टेडियम घुमाएको दृश्यले धेरैको आँखामा आँसु ल्याएको थियो । किनभने मैदानमा उनै रोड्रिगेज पनि आँसु झारिरहेका थिए । आफ्ना प्रत्येक खेलमा गोल गरेका रोड्रिगेजले गोल्डेन बुटसमेत जिते । उनको गोल प्रतियोगिताकै सर्वोत्कृष्ट ठहरियो ।
त्यसको चार वर्षपछि उनै रोड्रिगेजको टोली कोलम्बिया रुस विश्वकपमा आफ्नो पहिलो खेलको तयारीमा जुटिरहेको छ । कोलम्बियाले चार वर्षअघि पनि समूहगत चरणमै प्रतिस्पर्धा गरेको एसियाली टोली जापानविरुद्धको खेलसँगै रुसमा आफ्नो यात्रा सुरु गर्दैछ । यही खेलपछि चार वर्षअघि ब्राजिलको मैदानमा कायम गरेको प्रभुत्वलाई रोड्रिगेजले रुस पनि कायम गर्ने नगर्ने संकेत मिल्नेछ ।
समूह ‘एच’अन्तर्गत हुन लागेको यो खेल सारान्स्कस्थित मार्दोभिया एरेनामा नेपाली समयअनुसार ५:४५ बजे सुरु हुनेछ । कोलम्बिया र जापानले ब्राजिल विश्वकपमा पनि समूहगत चरणमै प्रतिस्पर्धा गरेका थिए । उक्त खेलमा दक्षिण अमेरिकी टोली ४-१ गोलले विजयी भएको थियो । यो जितमा रोड्रिगेजले पनि एक गोलको मद्दत गरेका थिए ।
मंगलबारको खेलअघि त्यो पराजयको बदला लिने वा आफ्नो जितको यात्रालाई कायमै राख्ने ? जापान र कोलम्बिया दुवैसँग अवसर रहनेछ । यद्यपि, सन् १९९८ मा पहिलोपटक सहभागी भएयता नियमित रूपमा विश्वकप खेल्दै आएको जापानको तयारी यसपटक भने केही बिथोलिएको छ । केही समयअघि मात्रै प्रशिक्षक बर्खास्त गर्नु परेपछि रुस विश्वकपमा जापानी टोली त्यहाँको फुटबल संघका प्राविधिक निर्देशक अकिरा निसिनोले सम्हालिरहेका छन् । उनको नेतृत्वमा जापानले अभ्यास खेलमा नियमित हार बेहोरिरहेको छ । त्यसको ठीक विपरीत रोड्रिगेजसहित राडामेल फाल्काओजस्ता अनुभवी खेलाडीको साथ पाएको कोलम्बियाले पछिल्ला खेलमा आफूलाई लयमा राखेको छ ।
विगतमा यी दुई
कुल खेल : ३
कोलम्बिया विजयी : २
जापान विजयी : ०
बराबरी : १
कोलम्बिया
विश्वकप सहभागिता : छैटौंपटक
उपलब्धि : क्वार्टरफाइनल (सन् २०१४)
फिफा वरीयता : १६
जापान
विश्वकप सहभागिता : छैटौंपटक
उपलब्धि : प्रिक्वार्टरफाइनल (सन् २००२ र सन् २०१०)
फिफा वरीयता : ६१
प्रभाव पार्न सक्ने खेलाडी
राडामेल फाल्काओ (कोलम्बिया)
फ्रान्सेली क्लब मोनाकोका मुख्य स्ट्राइकर राडामेल फाल्काओ कोलम्बियन राष्ट्रिय टोलीका पनि महत्वपूर्ण खेलाडी हुन् । फाल्काओ युरोपेली क्लब फुटबलमा चम्किएको लामै समय भइरहेको छ । उनीसँग स्पेनिस ला लिगा, इङ्लिस प्रिमियर लिग, फ्रान्सेली लिगलगायत युरोपका ठूला लिग खेलेको अनुभव पनि छ । तर, उनी पहिलोपटक विश्वकप फुटबल खेल्दैछन् ।
रुसमा उनले खेल्ने पहिलो खेल विश्वकपको डेब्यु खेल हुनेछ । कोलम्बियाले सन् २००२ देखि सन् २०१० सम्मको पछिल्ला तीन विश्वकपको छनोट प्रतियोगिता पार गर्न सकेन । १६ वर्षपछि पहिलो विश्वकपका रूपमा कोलम्बियाले चार वर्षअघि सन् २०१४ को ब्राजिल विश्वकपमा स्थान सुरक्षित गर्दा फाल्काओ टोलीका महत्वपूर्ण खेलाडी थिए । यद्यपि प्रतियोगिता सुरु हुनुअघि नै चोटग्रस्त भएपछि उनी टोलीसँग ब्राजिल जान सकेनन् ।
त्यसैले त्यति बेला उनको विश्वकप खेल्ने सपना पूरा हुन पाएन । उनले त्यसयता पनि आफूलाई उच्च लयमै राखेका छन् । अहिले उनी पूर्ण रूपमा फिट छन् र टोलीसँगै आफ्नो पहिलो विश्वकप खेल्न रुस पुगेका छन् । अवस्था कस्तो छ भने उनका लागि यो विश्वकप पहिलो र अन्तिम दुवै हुन सक्छ । उमेरले ३२ वर्ष पुगिसकेका फाल्काओ अर्काे विश्वकपसम्म यही लयमा नरहन पनि सक्छन् । वा उनलाई पछि पार्ने युवा खेलाडीहरूको उदय पनि हुन सक्नेछ ।
त्यसैले फाल्काओ आफ्नो पहिलो विश्वकप सहभागितालाई अविस्मरणीय बनाउन चाहन्छन् । त्यसका लागि उनले टोलीलाई पुर्याउने योगदान अझ महत्वपूर्ण हुने पक्का छ । सन् २००७ देदि राष्ट्रिय टोलीबाट खेल्न थालेका फाल्काओले अहिलेसम्म ७१ खेलमा २९ गोल गरेका छन् ।
सिन्जी कागावा (जापान)
सिन्जी कागावा जापानी टोलीका अनुभवी खेलाडी हुन् । आक्रामक मिडफिल्डरको पोजिसनबाट खेल्ने कागाजासँग युरोपका ठूला क्लबाट फुटबल खेलेको अनुभव पनि छ । हाल जर्मनीको बोरुसिया डर्टमन्डसँग अनुबन्धित रहेका कागावाले म्यानचेस्टर युनाइटेडबाट इङ्लिस प्रिमियर लिग पनि खेलेका छन् । कागावासँग जापानी राष्ट्रिय टोलीबाटै पनि विश्वकप फुटबललगायत ठूला अन्तर्राष्ट्रिय प्रतियोगिता खेलेको अनुभव छ ।
छोटो कद भए पनि कागावा मिडफिल्डबाट सधैं सशक्त प्रदर्शन गर्छन् । उनी टोलीका लागि पनि नियमित गोल गरिरहन्छन् । बलसँगको गति, विपक्षी खेलाडीसँग बल खोस्न सक्ने क्षमता र मिडफिल्डबाट खेलेर पनि गोल गरिरहने उनको छविले नै कागावालाई युरोपेली ठूला क्लबको रोजाइमा पार्ने गरेको छ । कागावा आफ्नो करिअरको दोस्रो विश्वकप फुटबल खेल्दैछन् ।
सन् २०१० को विश्वकपमा उनी टोलीमा परेनन् । ब्राजिल विश्वकपमा टोलीका मुख्य खेलाडी रहेका उनी रुस विश्वकपमा पनि त्यही भूमिकामा छन् । जापानले यसपटक पुराना खेलाडीलाई प्राथमिकतामा राखेर विश्वकप टोली बनाएको छ । टोलीका प्राय: खेलाडी तेस्रो विश्वकप खेल्दैछन् । त्यस बाहेकका केही खेलाडी नयाँ छन् । यो अवस्थामा अनुभव र खेल्ने पोजिसनका कारणले पनि टोलीलाई रुस विश्वकपमा अघि बढाउन उनै कागावाको भूमिका महत्वपूर्ण हुने निश्चित छ ।
प्रतिक्रिया दिनुहोस !
