काठमाडौं : ललित स्मृति यू-१८ फुटबल प्रतियोगितामा सुदूरपश्चिम फुटबल क्लबले मनाङ मर्स्याङ्दी क्लबलाई नमीठो धक्का दिएको छ । ललितपुरको सातदोबाटोस्थित एन्फा मैदानमा सोमबार भएको पहिलो खेलमा सुदूरले मनाङलाई ४-२ गोलले हरायो । खेलमा मनाङले १८औं मिनेटमा अग्रता लिएको थियो । मनाङका कार्लोस बर्खारियाले पहिलो गोल गरे ।
मनाङको अग्रतालाई सुदूरले एक मिनेटमै तोडेको थियो । सुदूरका राजीव चौधरीले १९औं मिनेटमा बराबरी गोल फर्काए । त्यसपछि मनाङका विन कार्कीले ४३औं मिनेटमा अर्को गोल गरे । दोस्रो हाफमा खेलमा फर्किएको सुदूरले तीन गोल थपेको थियो । सुदूरका लागि ७८औं मिनेटमा किरण बोहोरा, ८०औं मिनेटमा विजय क्षेत्री र ८६औं मिनेटमा नवीन भट्टराईले गोल गरे ।
यसैगरी अर्को खेलमा हिमालयन शेर्पाले थ्रीस्टार क्लबलाई ६-२ गोलले पराजित गर्यो । शेर्पाका लागि सञ्जय धिमाल एक्लैले पाँच गोल गरे । उनले पाँचौं, ५०औं, ६२औं, ६४औं र ६८औं मिनेटमा गोल गरेका थिए । अर्को गोल अनिल आलेमगरले ७४औं मिनेटमा थपे । थ्रीस्टारका लागि नीराजन महर्जनले र जेनिस प्रजापतिले एकएक गोल गरे ।
अखिल नेपाल फुटबल संघ (एन्फा)का स्वर्गीय कार्यवाहक अध्यक्ष ललितकृष्ण श्रेष्ठको स्मृतिमा आयोजित प्रतियोगितामा १८ टोलीको सहभागिता छ । लिगकम नकआउटका आधारमा खेलाइएको प्रतियोगितामा सहभागी टोलीलाई चार समूहमा विभाजन गरिएको छ । प्रतियोगिताको विजेता टोलीले तीन लाख र उपविजेता टोलीले एक लाख ५० हजार रुपैयाँ पुरस्कार पाउनेछन् । विधागत रूपमा उत्कृष्ट हुने खेलाडीले जनही १० हजार रुपैयाँ पाउनेछन् ।
प्रतिक्रिया दिनुहोस !
