मस्को : रुस विश्वकपमा बलियो टोली स्पेनले समूहगत चरणको आफ्नो दोस्रो खेलमा बुधबार एसियाली प्रतिद्वन्द्वी इरानसँग खेल्दै छ । पहिलो खेलमा क्रिस्टियानो रोनाल्डोको पोर्चुगलसँग ३-३ गोलको बराबरी खेलेको स्पेनिस टोली इरानविरुद्ध भने जितसहित प्रिक्वार्टरफाइनल प्रवेशको सम्भावना बलियो बनाउने धुनमा छ । यद्यपि पहिलो खेलमा मोरक्कोविरुद्ध १-० को जितसहित समूहमा सर्वाधिक तीन अंक बटुलेको इरान पहिलो जितपछि उत्साहित छ ।
त्यसैले यी दुई टोलीबीचको खेल रोचक हुने अनुमान गरिएको छ । इरानले मोरक्कोविरुद्धको खेलमा सुधार ल्याउन नसके खेल स्पेनको पक्षमा एकपक्षीय हुने सम्भावना पनि उत्तिकै छ । यी दुई टोलीबीचको स्तरमा निकै अन्तर छ । सन् २०१० मा विश्वकप जितेको स्पेन १५औं पटक विश्वकप खेल्दैछ । मात्र पाँचौंपटक विश्वकप खेल्दै गरेको इरानले अहिलेसम्म समूहगत चरण नै पार गर्न सकेको छैन ।
विश्वकपमा भने यी दुई टोली पहिलोपटक आमुन्नेसामुन्ने हुन लागेका हुन् ।
प्रतियोगितामा बुधबार नै समूह ‘ए’अन्तर्गत उरुग्वेले साउदी अरेबियासँग प्रतिस्पर्धा गर्दै छ । साउदीले प्रतियोगिताको उद्घाटन खेलमै आयोजक रुससँग ५-० गोलको भारी अन्तरको पराजय बेहोरेको छ । त्यसैले एसियाको प्रतिनिधित्व गरिरहेको साउदी उरुग्वेविरुद्ध कम्तीमा अंक खोस्ने प्रयासमा हुनेछ ।
यद्यपि लुइस स्वारेज, एडिन्सन काभानीजस्ता खेलाडी रहेको उरुग्वेविरुद्ध साउदीलाई निकै मुस्किल हुने पक्का छ । पहिलो खेलमा इजिप्टविरुद्ध १-० को जित निकालेको उरुग्वेले प्रिक्वार्टरफाइनल चरणको सम्भावना बलियो बनाएको छ । यी दुई टोलीले पनि विश्वकप फुटबलमा अहिलेसम्म एकअर्काविरुद्ध खेलेका छैनन् ।
प्रभाव पार्न सक्ने खेलाडी
डिएगो कोस्टा (स्पेन)
स्पेनले गत शुक्रबार पोर्चुगलसँग ३-३ गोलको बराबरी खेल्दा डिएगो कोस्टा एक्लैले दुई गोल गरेका थिए । खेलमा क्रिस्टियानो रोनाल्डोले दुईपटक पोर्चुगललाई अगाडि बढाएका थिए । तर, प्रत्येकपटक उनै कोस्टाले स्पेनलाई बराबरीमा फर्काएका थिए । स्पेनी टोलीका मुख्य स्ट्राइकर कोस्टाले प्रतियोगिताको पहिलो खेलबाट आफ्नो जादु देखाउन सुरु गरिसकेका छन् ।
घरेलु टोली एट्लेटिको म्याड्रिडमा आबद्ध रहेका कोस्टा टोलीलाई आवश्यक परेको कुनै पनि बेला गोल गर्न सक्षम खेलाडी हुन् । विपक्षी टोलीको डीबक्सभित्र बलसँग सहजै खेल्न सक्ने कोस्टा नियमति रूपमा गोल निकाल्न खप्पिस छन् । त्यसैले उनी रुस विश्वकपमा स्पेनिस टोलीको मुख्य खेलाडीका रूपमा रहेका छन् । पहिलो खेलको बराबरीपछि स्पेन बाँकी रहेको खेलमा जित हात पार्दै प्रतियोगिताको अघिल्लो चरण प्रवेश गर्ने उद्देश्यमा छ ।
टोलीको यो उद्देश्य सफल बनाउन कोस्टाकै भूमिका महत्वपूर्ण रहने पक्का छ । घरेलु स्पेनिस ला लिगासहित इङ्लिस प्रिमियर लिगसमेत खेलेको अनुभव सँगालिसकेका कोस्टा टोलीका अनुभवी खेलाडी पनि हुन् । चेल्सीबाट इङ्लिस प्रिमियर लिग उपाधि जितेका कोस्टाले यो सिजन एट्लेटिको म्याड्रिडबाट युरोपेली क्लब फुटबलको दोस्रो ठूलो प्रतियोगिता युरोपा लिग पनि जितेका छन् ।
उनी यही सफलता राष्ट्रिय टोलीबाट समेत दोहोर्याउन चाहन्छन् । त्यसैले रुस विश्वकपमा टोलीको बाँकी खेलमा उनको प्रदर्शन अझ हेर्न लायकको हुनेछ । सन् २०१४ मा स्पेनिस राष्ट्रिय टोलीबाट डेब्यु गरेका कोस्टाले त्यसयता २१ खेल खेलेर नौ गोल पनि गरिसकेका छन् ।
एडिन्सन काभानी (उरुग्वे)
स्ट्राइकर एडिन्सन काभानी उरुग्वेको राष्ट्रिय टोलीका महत्वपूर्ण खेलाडी हुन् । फ्रान्सेली क्लब पेरिस सेन्ट जर्मन (पीएसजी)बाट व्यावसायिक फुटबल खेल्दै आएका काभानीले पीएसजीलाई युरोपकै सशक्त टोलीका रूपमा स्थापित गराउन महत्वपूर्ण योगदान पुर्याउँदै आएका छन् । पछिल्ला केही सिजन उनी पीएसजीका लागि गोल मेसिनकै रूपमा रहेका छन्।
उनकै सहयोगमा पीएसजीले घरेलु फ्रान्सेली लिगको उपाधि नियमित रूपमा जित्दै आएको छ । रुस विश्वकपमा उरुग्वेले पनि काभानीबाट यस्तै प्रदर्शनको आशा गरेको छ । पहिलो संस्करणसहित दुई विश्वकप फुटबलको उपाधि जितेको उरुग्वेले पछिल्लो समय भने गतिलो प्रदर्शन गर्न सकिरहेको छैन । रुस विश्वकपको पहिलो खेलमै पनि उरुग्वेले लामो समयपछि विश्वकपमा सहभागिता जनाएको इजिप्टसँग १-० को झिनो अन्तरको जित हात पारेको थियो । सो जितका लागि उरुग्वेले रक्षक जोसे जिमिनेजको गोलको सहयोग लिनु परेको थियो ।
त्यसैले आगामी खेलमा उरुग्वेको सफलताका लागि काभानीले सशक्त प्रदर्शन गर्नु आवश्यक छ । शारीरिक रूपमा निकै सशक्त देखिने उनी खुट्टा र हेडिङ दुवैबाट नियमित गोल गरिरहने खेलाडी हुन् । सन् २००८ देखि नै उरुग्वेको राष्ट्रिय टोलीबाट खेल्न थालेका काभानीले हालसम्म एक सय दुई खेल खेल्दै ४२ गोल गरेका छन् । रुस विश्वकपको अन्त्य सम्ममा उनको यो आँकडामा खेल संख्या मात्रै हैन, गोलको संख्या पनि बढ्ने विश्वास गर्न सकिन्छ ।
प्रतिक्रिया दिनुहोस !
