वीरेन्द्रनगर : अन्नपूर्ण पोस्ट् अन्तर्राष्ट्रिय कर्पोरेट ब्याडमिन्टन छनोट प्रतियोगितामा सुर्खेतले एकलौटी जित हात पारेको छ । वीरेन्द्रनगरमा आइतबारदेखि सञ्चालित तीनदिने प्रतियोगिताको सबै स्पर्धामा सुर्खेतका खेलाडी विजयी भए । मंगलबार सम्पन्न प्रतियोगिताबाट ११ जना खेलाडी अन्तर्राष्ट्रिय प्रतियोगिताका लागि छनोट भए । छनोट हुने सबै सुर्खेतका खेलाडी हुन् ।
जिल्ला ब्याडमिन्टन संघको सहजीकरणमा वीरेन्द्रनगरको प्रहरी व्यायामशालामा सञ्चालित प्रतियोगितामा कर्णाली प्रदेशका दैलेख, सुर्खेत, जाजरकोट, जुम्ला, रुकुम, सल्यान र हुम्लाका एक सय २८ खेलाडीले भाग लिएका थिए । काठमाडौंमा हुने अन्तर्राष्ट्रिय प्रतियोगिताका लागि छनोट खेलका विजेता र उपविजेता सहभागी हुनेछन् । विजयी खेलाडीलाई प्रदेश प्रहरी प्रमुख सुरेशविक्रम शाहलगायतले पुरस्कार प्रदान गरे ।
नीराजन उत्कृष्ट घोषित
प्रतियोगितामा सुर्खेतका नीराजन चौधरी उत्कृष्ट खेलाडी भएका छन् । उनी पुरुष एकल र १९ वर्षमुनिको एकलमा स्पर्धामा पहिलो भए । मंगलबार बिहान भएको पुरुष एकलमा नीराजनले सुर्खेतकै जितबहादुर लामिछानेलाई २१-१७, १९-२१, २१-१९ ले हराए । १९ वर्षमुनिको पुरुष एकलमा नीराजनले सुर्खेतकै नगेन्द्र बम ठकुरीलाई २१-९, २१-१७ ले हराए । प्रतियोगिताकै उत्कृष्ट खेलाडी बनेका उनलाई जिल्ला ब्याडमिन्टन संघका वरिष्ठ उपाध्यक्ष चेत अधिकारीले तीन हजार रुपैयाँबाट पुरस्कृत गरे ।
यसैगरी महिलामा सुर्खेतकै सामना भट्टराई प्रतियोगितामा उत्कृष्ट भएकी छन् । उनले १९ वर्षमुनिको महिला एकल र महिला एकलमा सफलता हात पारिन् । उनले सोमबार भएको फाइनलमा सुर्खेतकै अग्रिमा भण्डारीलाई २१-१४, २४-२२ ले हराइन् । महिला एकलमा पनि उनले सुर्खेतकी सेस्मा श्रीपालीलाई २१-९, २१-६ ले हराएकी थिइन् । मिक्स युगलमा खगेन्द्र खत्री र सेस्मा श्रीपालीको जोडी पहिलो भयो ।
उनीहरूले सुर्खेतका नगेन्द्रबहादुर थापा र पुष्पा शाहीको जोडीलाई २१-१७, २२-२० र २१-१७ ले हराए । पुरुष युगलमा दीपेश चौधरी र युवराज गुरुङको जोडी पहिलो भयो । उनीहरूले नगेन्द्रबहादुर थापा र खगेन्द्र खत्रीको जोडीलाई २१-१६, ७-२१, २१-१७ ले हराए ।
प्रतियोगितामा सुर्खेत बाहिरका खेलाडी तेस्रो स्थानमा अटाए । तेस्रो हुनेमा पुरुष एकलमा जाजरकोटका जनक भदेल, सुर्खेतका महेशविक्रम सिंह, पुरुष युगलमा रुकुमका शशिराम रावत र हरि चन्द र सुर्खेतका विष्णु पौडेल र कर्ण बुढाको जोडी रहेको छ । यस्तै महिला एकलतर्फ सुर्खेतकै पुष्पा शाही, १९ वर्षमुनिको महिला एकलमा पुष्पा शाही र सेस्मा श्रीपाली, १९ वर्षमुनिको पुरुष एकलमा सुर्खेतकै सुजित कार्की र अनिल मल्ल तेस्रो भए ।
प्रतिक्रिया दिनुहोस !
