भक्तपुर : कानुन न्याय तथा संसदीय व्यवस्था मन्त्री शेरबहादुर तामाङले मुलुकको आर्थिक समृद्धिका लागि सहकारी क्षेत्रलाई सबल र सक्षम बनाउदै अगाडि बढ्नु पर्नेमा जोड दिएका छन्। राष्ट्रिय सहकारी बैंक लिमिटेडले भक्तपुरमा आयोजना गरेको बैंक र सदस्य संघ संस्थाबीचको अन्तरक्रिया कार्यक्रमको उद्घाटन अवसरमा बोल्दै देश विकासका लागि सहकारी अपरिहार्य भएको बताएका हुन् ।
जनतासग रहेको श्रम, सीप र पुँजी, स्थानीय स्रोतको उत्पादन, प्रशोधन र बजारीकरणमा सहकारी महत्वपूर्ण हुने बताए। सहकारी क्षेत्रमा पनि केही समस्याहरु छन्, केही कानुनी असजिलाहरु छन्, तिनलाई व्यवस्थापन गरेर अगाडि जान सके सहकारी क्षेत्रले समृद्धिको अभियानमा महत्वपूर्ण भूमिका निर्वाह गर्ने उनको भनाई थियो । सहकारीमैत्री कानुन निर्माणका लागि सक्दो सहयोग गर्ने समेत उनले प्रतिवद्वता व्यक्त गरे।
सहकारी क्षेत्रको प्रवद्र्धनका लागि स्थापित राष्ट्रिय सहकारी बैंकलाई सबल बनाएर राज्यले सहकारी क्षेत्रमा लगानी गर्ने बजेटलाई सहकारी बैंकमार्फत परिचालनका लागि पहलकमदी गर्ने प्रतिवद्धता पनि उनले व्यक्त गरे ।
राष्ट्रिय सहकारी बैंकका प्रवन्ध सञ्चालक के.बी. उप्रेतीले देशभर सञ्जाल भएको, ४४ वटा शाखा मार्फत सहकारी संघ संस्थाहरुलाई सेवा दिदै आएको बैंकलाई गरिवी निवारणका क्षेत्रमा लैजाने बजेट परिचालनको जिम्मा दिए जिम्मेवारी लिन तयार रहेको बताए ।
भक्तपुर जिल्लाका २ सय भन्दा बढी सहकारी संघ संस्थाका ३ सय भन्दा बढी सहकारीकर्मीहरुको सहभागिता रहेको थियो ।
कार्यक्रममा बैंकका सहायक महाप्रवन्धक हरिकृष्ण साकपोटाले बैंकको परिचय र अवस्था तथा आगामी कार्ययोजनाका विषयमा प्रस्तुतीकरण राखेका थिए । कार्यक्रम बैंकका प्रवन्ध सञ्चालक उप्रेतीको अध्यक्षता, सञ्चालक सरिता भट्टराईको सञ्चालन र शाखा प्रमुख सविना श्रेष्ठको स्वागतमा सम्पन्न भएको थियो।
सोही अवसरमा बैंकको भक्तपुर शाखामा आर्थिक वर्ष २०७३÷०७४ मा उत्कृष्ट कारोबार गर्ने शुभकामना सेभिङ्ग एण्ड क्रेडिट को–अपरेटिभ र नियमित कारोवार तर्फ पारिजात सेभिङ्ग एण्ड क्रेडिटको–अपरेटिभलाई कार्यक्रमका प्रमुख अतिथि मन्त्री तामाङले सम्मान गरे।
प्रतिक्रिया दिनुहोस !
