काठमाडौं : वसन्त चौधरीद्वारा रचित ‘वसन्त’ काव्यसंग्रह नौ भाषामा प्रकाशित भएको छ । मंगलबार आयोजित अन्तरक्रियात्मक कार्यक्रममा नौ फरकफरक भाषाको संग्रहबारे चर्चा गरियो । नेपाली, अंग्रेजी, हिन्दी, नेवारी, तामाङ, मैथिली, भोजपुरी, मारवाडी र बंगाली भाषामा काव्यसंग्रह प्रकाशन गरिएको हो ।
चौधरीद्वारा रचित यो चौथो काव्यसंग्रह हो । गोष्ठीमा सहभागी सावित्री मल्ल कक्षपतिले चौधरीका कवितामा दर्शनको प्रवाह रहेको बताइन् । ‘कवितामा राष्ट्र, प्रकृति, मायाप्रेम र दर्शनजस्ता विषय अटाएका छन्’, उनले भनिन्, ‘जुन सहज र सत्य लाग्छन् ।’ ‘निःशब्दले झस्काउँदा’, ‘साँझको बिसौनी’ कवितामा लेखकीय इमानदारिता झल्केको पनि उनले बताइन् ।
चौधरीका कवितामाथि छलफल गर्ने क्रममा कुमारी लामाले विविध भाषामा संग्रह प्रकाशित गरेर चौधरीले नेपाली भाषाप्रति देखाएको लगावले मन छोएको बताइन् । ‘भाषामा विविधता आजको आवश्यकता हो’, उनले भनिन्, ‘समय बुझेर विविध भाषामा संग्रह प्रकाशित गर्नु निकै सराहनीय काम भएको छ ।’ व्यावसायिक र साहित्यिक व्यक्तित्वलाई समानान्तर रूपमा अगाडि बढाउनु चुनौतीको विषय भएको तर चौधरीले यी दुवैलाई व्यवस्थित गर्न सकेको लामाले बताइन् ।
डा. लक्ष्मणप्रसाद गौतमले चौधरीका कविता सरल भाषामा गहिरो भाव छोड्ने खालका भएको बताए । लक्ष्मणले भने, ‘चौधरीका कविता वेदको मन्त्रजस्तै छ । गहिरिएर बुझ्न सके कविताले हृदय छुन्छ ।’
व्यवसायी तथा कवि चौधरीले भने आफू कविता लेख्न सिक्दै गरेको बताए । ‘म उपल्लो दर्जाको कवि होइन, म त विद्यार्थी हुँ, सिक्दै छु ।’ नौ भाषामा संग्रह प्रकाशित गर्नुको उद्देश्य बताउँदै चौधरीले भने, ‘यो नयाँ प्रयोग हो, सकेसम्म विविध भाषामा प्रकाशित हुनुपर्छ भन्ने मान्यताले प्रकाशन गरेको हुँ ।’ कविता लेख्दा नेपाली भाषामा लेख्न सुरु गरे पनि हिन्दी भाषामा शब्द चयनको छुट महसुस गरेको उनले बताए ।
प्रतिक्रिया दिनुहोस !
