एक्साभेटर बोकेको ट्रक सप्तकोसीमा खस्यो, दुईको मृत्यु, सात घाइते
सप्तरीः हेटौँडाबाट एक्साभेटर बोकेर बिराटनगरतर्फ जाँदै गरेको ट्रक सप्तकोशी नदीमा पल्टिएको छ । एक्साभेटरसहितको ट्रक सुनसरी–सप्तरीस्थित कोसी व्यारेजको पुलबाट दक्षिणतर्फको भंगालेमा पल्टिँदा दुईजनाको ज्यान गएको छ भने सातजना घाइते भएका छन् ।
एक्साभेटर सप्तकोसीमा खसेर भएको दुर्घटनामा परेर ट्रक चालक सुनसरीको बराहक्षेत्रका विनोद रसाइली र स्कारभेटर चालक रामधुनीका घनश्याम चौधरीको मृत्यु भएको प्रहरीले जनाएको छ ।
कोशी ब्यारेज प्रहरीका अनुसार पश्चिमबाट पूर्वतर्फ आउँदै गरेको ना ४ ख ३५६ नम्बरको ट्रक अनियन्त्रित भइ पल्टिँदा ट्रकमा लोड गरिएका स्काभेटरले किचेर उनीहरुको ज्यान गएको हो । यो घटनामा अन्य ७ जना घाइते भएका छन् ।
जिल्ला प्रहरी कार्यालय सप्तरीका प्रमुख एसपी मुकेशकुमार सिंका अनुसार एक्साभेटरले किचेर २ को मृत्यु भएको छ भने सातको जीवितै उद्धार गरिएको छ । घाइतेहरुलाई उपचारका लागि जिल्ला अस्पताल इनरुवा र बिराटनगर पठाइएको छ ।
प्रतिक्रिया दिनुहोस !
