बेल्ट एन्ड रोड इनिसिएटिभ (बीआरआई) परियोजनासँग सम्बन्धित दुुवै देशबीच भएका सहमति र सम्झौता पालना गर्न नेपाल र चीन पूर्ण सहमत भएका छन् । चीन भ्रमणमा रहेका प्रधानमन्त्री केपी ओली र चिनियाँ प्रधानमन्त्री ली खछियाङबीच भेटवार्तापछि जारी संयुक्त विज्ञप्तिमा सो कुरा उल्लेख गरिएको छ । विज्ञप्तिमा नेपालले लिएको एक चीन नीतिको स्वागत गर्दै तिब्बत र ताइवानलाई चीनको आन्तरिक मामिलाका रूपमा व्याख्या गरिएको छ ।
चीनले राजनीतिक रूपान्तरण र स्थायीत्व प्राप्त गरेकोमा नेपाललाई बधाई दिएको विज्ञप्तिमा उल्लेख छ । नेपालले तीन तहको निर्वाचन सफलतापूर्वक सम्पन्न गरेकोमा खुसी व्यक्त गर्दै ओलीको नेतृत्वमा नेपालले ‘समृद्ध नेपाल र खुसी नेपाली’को सपना साकार हुने चिनियाँ विश्वासलाई विज्ञप्तिले समेटको छ ।
‘दुवै देशले एक अर्का देशको स्वतन्त्रता, स्वाधीनता र भौगोलिक अखण्डतालाई अविछिन्न सम्मान गर्नेछन्’, १४ बुँदे संयुक्त विज्ञप्तिमा भनिएको छ, ‘नेपालले अंगिकार गर्ने सामाजिक र विकास प्रणालीलाई चीनले स्वागत गर्नेछ ।’ दुवै पक्षले उच्चतहको भ्रमण आपसी सम्बन्ध सुधार गर्न महŒवपूर्ण हुने भन्दै दुवै देशले निरन्तर उच्चतहको भ्रमण आदानप्रदान गर्ने र दुई पक्षीय हितका विषयमा छलफल गर्न पनि सहमत भएको विज्ञप्तिमा जनाइएको छ ।
विद्यमान सरकारी संयन्त्रको उच्चतम सदुपयोग गर्दै सबै सरकारी निकाय र राजनीतिक पार्टीहरूबीच सम्पर्कमा रहन पनि नेपाल–चीन सहमत भएको विज्ञप्तिमा उल्लेख गरिएको छ । नेपालका सबै क्षेत्रमा भित्रिने चिनियाँ लगानीको नेपालले स्वागत गर्ने विज्ञप्तिमा उल्लेख छ । नेपालले चिनियाँ लगानीलाई स्वागत गर्न तत्पर रहेको बताउँदै लगानी भित्र्याउन प्रत्याभूत गर्नु पर्ने आवश्यक व्यावसायिक वातावरण निर्माण गर्न नेपाल तत्पर रहेको पनि विज्ञप्तिमा उल्लेख गरिएको छ ।
नेपाल–चीन दुवै पक्षले तातोपानी नाका खोल्न तयार रहेको जनाउँदै मितेरी पुल निर्माणसम्बन्धी सम्झौता भएकोमा खुसी व्यक्त गरेका छन् । दुवै देशमा हवाई सम्पर्क विस्तारका लागि चिनियाँ र नेपाली हवाई व्यवसायीसँग आग्रह गरिएको विज्ञप्तिमा चिनियाँ लगानीमा पोखरामा भइरहेको विमानस्थल निर्माणमा तदारुकता देखाउन दुवै पक्ष सहमत भएको उल्लेख छ । विज्ञप्तिमा नेपालले पहिचान गरेको ठाउँमा तेल भण्डार निर्माणको सम्भाव्यता अध्ययन गर्न दुवै देश सहमत भएको र चीनले नेपालमा तेल खानी खोजीमा सहयोग गर्ने पनि उल्लेख छ ।
प्रतिक्रिया दिनुहोस !
