विश्वकपमा खेलाडीको हेयर स्टाइललाई लिएर धेरै चर्चा हुन्छ । फुटबलप्रेमी त झन् आफूलाई मन पर्ने खेलाडीको जस्तै हेयर स्टाइल बनाउन आतुर हुन्छन् । मैदानमा खेलाडीहरू गोल गर्ने प्रयास गरिरहँदा क्यामेराका लेन्सहरू घरिघरि खेलाडीको हेयर स्टाइलमा फोकस हुन्छन् । अनि उनीहरूले गर्ने गोलको मात्रै होइन, कपालको पनि चर्चा चल्छ ।
खेलाडी पनि फ्यानकै लागि फरक र आकर्षक कपाल बनाउँछन् । अहिलेका फुटबल खेलाडी प्रायः चलनचल्तीको हेयर कटमा छन् । धेरैजसो खेलाडीको हेयर स्टाइल फुटबल ग्राउन्ड भित्रभन्दा बाहिर बढी स्टाइलिस देखिन्छ । विश्वकप सुरु भएदेखि विश्वका राम्रा फुटबल खेलाडीको हेयर स्टाइल ट्रेन्डमा छ जसमा डेभिड बेकह्याम, क्रिस्टियानो रोनाल्डो, लियोनल मेसी, सर्जिओ रामोस र गेरेथ बेलको हेयर स्टाइल सबैभन्दा लोकप्रिय मानिन्छ । प्रायः फुटबल खेलाडीको हेयर मोहाक्स, किइफ, अन्डरकट्स, फेड्स, कोम ओभरस्जस्ता आकर्षक कटमा छन् । आफ्नो स्टाइलिस लुक र फेसन सेन्सले पनि फ्यानलाई पागल बनाउँछन् ।
सर्जिओ रामोस
विश्वको उत्कृष्ट डिफेन्डरको उपाधि पाएका सर्जिओ रामोस स्पेनिस टिमबाट रियल मड्रिडका लागि खेल्छन् । साथै उनी स्पेनको राष्ट्रिय टिमका लागि पनि खेल्दै आएका छन् । सुरुआती खेलमा उनलाई लामो कपालमा देख्न सकिन्थ्यो जब उनी भर्खरका युवा थिए । अहिले ३२ वर्षको उमेरसम्म आइपुग्दा रामोस क्लासिक लुकमा ज्यादा देखिन्छन् । र, यो लुक उनलाई निकै सुहाएको छ । रामोसको हेयर स्टाइल क्लिन कट छ । क्लासिक सर्ट हेयरमा देखिने रामोसको हेयर कट धेरैको रोजाइमा पर्छ ।
डेभिड डे’ हेया
स्पेनका गोलकिपर डेभिड डे’ हेया पछिल्ला केही वर्ष अलगअलग हेयर स्टाइलमा देखिए । तर उनको क्लासिक म्यान-बुन हेयर कटले सबैको ध्यान खिच्न सफल भयो । डेभिड उक्त स्टाइलमा निकै जमेका छन् । यो हेयर स्टाइलका लागि लामो कपाल पालेर रबरले पछाडि बाँधिन्छ ।
नेमार जेआर
नेमार दा सिल्भा सान्तोष जुनियर ब्राजिलका मुख्य फुटबल खेलाडी हुन् । उनलाई केबल ‘नेमार’ नामले विश्वभरि चिनिन्छ । जमानाअनुसार नयाँनयाँ हेयर कट गर्नेमा नेमार पनि पर्छन् । उनले प्रायः सबै हेयर कट अपनाएका छन् । उनको ‘लङ मेसी हेयर विथ लो फेड कट’ हेयर स्टाइल ज्यादा चर्चित छ । यो हेयर कट उनको क्षमतासँग पनि दाँजिन्छ । नेमारको स्टाइलिस हेयर कट र घाँटीको ट्याटु ‘किलर लुक’का लागि काफी छ ।
लिओनल मेसी
संसारकै लोकप्रिय फुटबल खेलाडीका रूपमा मेसीलाई लिने गरिन्छ । मेसीको हेयर स्टाइल जहिल्यै सामान्य हुन्छ । उनले आफ्नो कपाललाई फेसन आइकनको रूपमा कहिल्यै पेस गरेनन् । र यही सादगी उनका फ्यानलाई निकै मन पर्छ । मेसीको जस्तै हेयर स्टाइल बनाउन जेल र स्प्रे आवश्यक पर्दैन । उनी कपाललाई प्राकृतिक रूपमा जस्तो छ त्यस्तै छोड्न चाहन्छन् । एफसी बार्सिलोनालाई १० नम्बरको स्ट्राइकरका रूपमा उनले अनगिन्ती रेकर्ड बनाएका छन् । आफ्नो फुटबल करिअरमा ६ सयभन्दा बढी गोल गर्ने मेसीको लामो र छोटो कपाल दुवै ट्रेन्डमा छन् ।
क्रिस्टियानो रोनाल्डो
रोनाल्डोबिना फुटबल र खेलाडीको चर्चा पूरा हुँदैन । उनी एक स्टाइलिस फुटबलर हुन् । रोनाल्डो यस्ता व्यक्ति हुन् जसको इन्स्टाग्राममा सबैभन्दा बढी फलोअर छन् । अन्य खेलाडीको हेयर स्टाइल प्रत्येक वर्ष परिवर्तन भएर आउँछ तर रोनाल्डोको कपाल कटाइमा त्यति धेरै फरक देखिँदैन । तर पनि उनी आफ्नो कपालमा सानोसानो परिवर्तन गरेर नयाँ लुकमा देखिने गर्छन् । २०१८ मा रोनाल्डो बसैलाई चकित बनाउने दृश्यमा देखिएका छन् । उनको जस्तो हेयर स्टाइल बनाउन काइँयोले सिधा माथितिर कोरिएको छोटो कपाल बनाउनुपर्ने हुन्छ ।
पाउल पोग्बा
फ्रान्सेली खेलाडी पाउल पोग्बाको हेयर स्टाइल सधैं विवादमा आउँछ । उनी पनि आफ्नो हेयर स्टाइललाई सधैं नयाँ नयाँ लुक दिन मन पराउँछन् । उनको छोटो कपालमा रङ प्रयोग भएको पनि हामी देख्न सक्छौं । कपालकै कारण चर्चामा आइरहने खेलाडी हुन् पोग्बा । आफ्नो देशको प्रिमियर लिग र म्यानचेस्टर युनाइटेडका लागि पनि उनी आफ्नो कपाल अर्थपूर्ण रङले सजाउने गर्छन् ।
एनटोन ग्रिजम्यान
कुनैकुनै खेलाडीको हेयर स्टाइल असाधारण हुन्छ । र, यसमा फ्रान्सेली स्ट्राइकर ग्रिजम्यान अग्रपंक्तिमा छन् । उनको लामो आधी कालो र सेतो कपाल प्रायः हेडबेनले अड्काइएको हुन्छ । यो हेयर स्टाइलमा उनी निकै राम्रा देखिन्छन् ।
प्रतिक्रिया दिनुहोस !
