कोरियालार्इ बलियो प्रतिद्वन्द्वी

मस्को : रुसमा जारी फिफा विश्वकपको शनिबार हुने समूह ‘एफ’को खेलमा एसियाली टोली दक्षिण कोरियाले बलियो प्रतिद्वन्द्वी मेक्सिकोसँग प्रतिस्पर्धा गर्दैछ । आफ्नो पहिलो खेलमा साविक विजेता जर्मनीलाई १-० गोलले पराजित गरेको मेक्सिको प्रतियोगितामा बलियो देखिएको छ । 

आफ्नो पहिलो खेलमा स्विडेनसँग १-० गोलले पराजित भएकाले दक्षिण कोरियालाई भने प्रतियोगितामा टिकिरहन जितको विकल्प छैन । पराजयले दक्षिण कोरिया प्रतियोगिताबाट बाहिरिन सक्छ । विश्वकपमा यसअघि एकअर्काविरुद्ध भएको प्रतिस्पर्धामा भने मेक्सिको बलियो देखिएको छ ।

विश्वकपको अन्तिम चरणको खेलमा यसअघि एकपटक मात्रै प्रतिस्पर्धा गर्दा मेक्सिको ३-१ गोलले विजयी बनेको छ । विश्वकपमा दोस्रोपटक भेट हुँदा मेक्सिकोसँग आफ्नो अपराजित यात्रालाई निरन्तरता दिने अवसर हुनेछ भने दक्षिण कोरियासामु अघिल्लो पराजयको बदला लिने अवसर हुनेछ ।