दमौली : तनहुँको भीमाद–ऋषिङ जोड्ने श्रृंगपथमा अहिले ओटासिल सडकमा निर्वाध यातायातका साधन चल्नुपर्ने हो । ३ वर्षअघि नै ओटासिल हुनुपर्ने सडकको काम अहिलेसम्म पनि नहुँदा तनहुँसहित पाल्पा, स्याङ्जा र नवलपुरसम्मका लागि मुख्य प्रस्थान बिन्दु ‘लाइफ लाइन’कै रुपमा रहेको सडक हिलाम्य भएर पैदल हिँड्नसमेत नमिल्ने भएको छ ।
बाटो चाँडै स्तरोन्नति हुने आशामा पाल्पाबाट काठमाडौं, नवलपुरको डेढगाउँ, पाल्पाको रामपुरसम्म नियमित बस सेवा सुरु भए । तनहुँको दक्षिणी भाग पहिल्यैदेखि यही मार्गको भरमा थियो । समयमा काम नहुँदा प्रभावित हुने यात्रुको संख्या बढ्दो छ । स्थानीय श्रृंग यातायात व्यवसायी समितिका कार्यालय प्रमुख दानबहादुर श्रेष्ठले वर्षायाम आउनासाथ हिलाम्य भएर सडकमा हिँड्नै नसकिने भएकाले बिरामी र नियमित आवतजावत गर्ने ठूलो संख्याका यात्रु अलपत्र पर्ने गरेको बताए । ‘बाटो सुध्रियो भनेर धेरै समितिले गाडी थपे तर स्तर सुध्रिन नसक्दा सबै समस्यामा छन्’, उनले भने ।
जिल्ला प्राविधिक कार्यालयले सुरुमा ग्राभेलका लागि २०७० सालमा स्वच्छन्द मना जेभीलाई २ वर्षे ठेक्का दिएको थियो । २ वर्षमा काम नसकिँदै सोही कम्पनीलाई सडक ओटासिल गर्न अर्को ठेक्का दिइयो । भीमादबाट ऋषिङसम्मको १७ किलोमिटर सडकमा ओटासिलको जिम्मा पाएको कम्पनीले थपिएको काम पनि समयमा सकेन । योजनाअनुसार ग्राभेल र ओटासिल गरी २०७४ सालमा सडक पूर्ण रुपमा सञ्चालनमा आउनुपर्ने हो । अहिलेसम्म ओटासिल त परको कुरा भयो वर्षायाममा सामान्य आवतजावतसमेत गर्न नसक्ने गरी सडक बिग्रेको छ ।
कम्पनीले तोकेको अन्तिम समय २०७४ जेठसम्म सडकको २० प्रतिशत काम पनि नभएपछि ६ महिनाका लागि समय माग गरियो । थपिएको ६ महिनामा पनि केही काम नभएपछि फेरि अर्को ६ महिना समय थपिएको थियो । ‘दुबै समयमा कम्पनीको काम सन्तोषजनक नभएकाले चालु आर्थिक वर्षको असार मसान्तमा काम सकिने सम्भावना छैन’, जिल्ला प्राविधिक कार्यालयका प्रमुख इन्जिनियर राम पराजुली भन्छन्, ‘काम सक्ने त आशै छैन कम्तीमा अबको एक वर्षमा सके धेरै ठूलो उपलब्धि हुन्थ्यो ।’ हालसम्म २८ प्रतिशतमात्रै काम भएको छ ।
२८ लाख जरिवाना
नौ करोड ८५ लाखमा ठेक्का लिएको कम्पनीले समयमा काम नसकेपछि आठ महिनायता दैनिक झण्डै १९ हजारको दरले हर्जाना तिरिरहेको छ । यस आधारमा हालसम्म झन्डै २८ लाख जरिवाना कम्पनीको भागमा छ । जरिवाना बढिरहँदा कम्पनी घाटामा गइरहेको छ भने चार जिल्लाको यातायातको मेरुदण्ड श्रृंगपथमा हरेक वर्षायाममा यात्रुले सास्ती भोगीरहेका छन् । कम्पनीले जिम्मा लिएर नसकेका अरु पनि धेरै निर्माण कार्य आफ्नो जानकारीमा रहेको इन्जिनियर पराजुलीको भनाइ छ ।
ऋषिङ गाउँपालिकाले आफ्नो क्षेत्रमा सडक कालोपत्रे थाले पनि ठेकेदारले थालेको भागमा काम नसकिएकाले पुरै गाउँपालिकाको सडकस्तर उन्नतिको काम रोकिएको छ । गाउँपालिकाका अध्यक्ष राजेन्द्रकृष्ण श्रेष्ठ भन्छन्, ‘ठेकेदारले नसक्ने हो भने सडकको जिम्मा हामी लिन तयार छौं ।’ ठेकेदारकै कारण गाउँपालिकाको काम प्रभावित भएको उनले बताए । सडकको अनुगमनका लागि गएका जिल्ला समन्वय समितिका प्रमुख शान्तिरमण वाग्ले समयमा काम नहुनु दुखद् रहेको बताउँछन् । ‘काम चाँडो सक्ने वातावरण बनाउन हामी क्रियाशील छौं’, उनले भने ।
प्रमुख जिल्ला अधिकारी भरतकुमार शर्माले सडकको काम नभएको गुनासोपछि आफूले निर्माण कम्पनीलाई ताकेता गरेको बताए । ‘तत्कालै काम अघि बढाउँछुु भनेका छन् तर स्थानीयस्तरमा काम भएन भने पछि प्राविधिक कार्यालयलाई समेत समन्वय गर्न भनेका छौं’, उनले भने । ठेकेदार अधिकारीले धेरै ठाउँमा काम भएकाले समयमा सक्न गाह्रो भएको तर अब काम थाल्ने बताउने गरेका छन् । छिटो काम सक्न ठेकेदार कम्पनी साँच्चीकै जिम्मेवार हुनुपर्ने इन्जिनियर पराजुली बताउँछन् ।
प्रतिक्रिया दिनुहोस !
