मस्को : सन् १९६६ मा उपाधि जितेयता विश्वकप फुटबलमा बारम्बार कमजोर प्रदर्शन गरेको इङ्ल्यान्डले रुस विश्वकपमा भने पहिलो खेलबाटै सशक्त प्रदर्शन गर्ने संकेत गरेको छ । इङ्ल्यान्डले रुस विश्वकपको आफ्नो पहिलो खेलमा ट्युनिसियालाई २-१ गोलले पराजित गर्दै सुखद सुरुआत गरेको छ ।
इङ्ल्यान्डले पहिलो खेलमा जितसहित विश्वकप फुटबलमा सुखद सुरुआत गरेको यो पछिल्लो १२ वर्षपछिको पहिलो अवसर हो । त्यही जित र सफलताबाट हौसिएको इङ्ल्यान्ड लगातार दोस्रो खेलमा समेत जितसहित प्रिक्वार्टरफाइनल चरणको यात्रा तय गर्ने योजनामा जुटेको छ । त्यसैले इङ्ल्यान्डले आइतबार समूह ‘जी’ अन्तर्गत आफ्नो दोस्रो खेलमा पानामासँग प्रतिस्पर्धा गर्दा जितकै योजना बनाएको छ ।
यद्यपि यो खेलमा इङ्ल्यान्ड र पानामा दुवैलाई फरक दुई उद्देश्यका लागि जित आवश्यक छ । पानामालाई पराजित गर्न सकेको अवस्थामा अन्तिम खेलअघि नै इङ्ल्यान्डको अन्तिम १६ को यात्रा पक्का हुन सक्नेछ । यो नतिजाले पानामा भने प्रतियोगिताको अन्तिम खेलअगावै बाहिरिन सक्छ । त्यसैले प्रतियोगितामा टिकिरहनका लागि भए पनि पानामालाई जितको विकल्प छैन ।
आइतबारको खेलअघि पानामाले इङ्ल्यान्डलाई पराजित गर्दै वा बराबरीमै रोकेर भए पनि आफ्नो प्रिक्वार्टरफाइनल पुग्ने सम्भावना जीवितै राख्ने सपना साँचेको हुनुपर्छ । यद्यपि पहिलो खेलमा बलियो बेल्जियमसँग ३-० ले पराजित भएको पानामालाई इङ्ल्यान्डविरुद्धको त्यो सपना पूरा गर्न सहज भने पक्कै हुनेछैन । राम्रा खेलाडीले भरिएको इङ्लिस टोली निकै बलियो देखिएको छ । हेरी केन, जेमी भर्डी, मार्कस रासफोर्ड, रहिम स्टर्लिङ, डेली अलीजस्ता खेलाडी रहेको इङ्ल्यान्डको क्षमता पानामाको भन्दा धेरै माथि देखिएको छ ।
टोलीको रक्षापंक्ति केही बलियो देखिए पनि आक्रमण निकै कमजोर रहेकाले पानामाका लागि इङ्ल्यान्डविरुद्धको जित वा बराबरीको नतिजा मुस्किल देखिएको हो । कमजोर ‘स्ट्राइकिङ लाइनअप’ कै कारण पानामाले आफ्नो पछिल्लो सात खेलमा मात्रै दुई गोल गर्न सफल भएको छ । यी दुई टोली कुनै पनि स्तरको प्रतियोगितामा पहिलोपटक एकआपसमा प्रतिस्पर्धा गर्दैछन् । यद्यपि पछिल्ला आआफ्ना खेलमा हात पारेको नतिजाअनुसार इङ्ल्यान्डलाई बलियो देखाएको छ ।
इङ्ल्यान्डले पछिल्लो आठ खेलमा आफूलाई निरन्तर अपराजित राखेको छ । पानामाले भने आफ्नो पछिल्लो आठमध्ये मात्र एक खेलमा मात्र जित हात पारेको छ । तुलनात्मक रूपमा कमजोर मानिएको पानामाविरुद्धको यही खेलबाट इङ्ल्यान्डले आफूलाई अझ सशक्त रूपमा प्रस्तुत गर्ने अपेक्षासमेत गरिएको छ । ट्युनिसियाविरुद्धको खेलमा १७ राम्रा गोल अवसर सिर्जना गरेर पनि इङ्ल्यान्डलाई जितका लागि खेलको ‘इन्जुरी’ समयसम्म कुर्नु परेको थियो । इङ्ल्यान्डले कम्तीमा पानामाविरुद्ध यी गल्तीलाई दोहोर्याउने छैन ।
हेड टु हेड
पहिलोपटक प्रतिस्पर्धा गर्दै
इङ्ल्यान्ड
विश्वकप सहभागिता : १५औं पटक
उपलब्धि : उपाधि (१९६६)
फिफा वरीयता : १२
पानामा
विश्वकप सहभागिता : पहिलो
उपलब्धि : पहिलोपटक सहभागी
फिफा वरीयता : ५५
प्रभाव पार्न सक्ने खेलाडी
हेरी केन, इङ्ल्यान्ड
इङ्लिस राष्ट्रिय टोलीका मुख्य खेलाडी हुन्, हेरी केन । टोलीका कप्तानसमेत रहेका केन एकभन्दा बढी भूमिकाले गर्दा पनि टोलीको महत्वपूर्ण सदस्यका रूपमा रहेका छन् । लामो समयपछि इङ्ल्यान्डले विश्वकप फुटबलमा सुखद सुरुवात गर्दा उनै केनको भूमिका महत्वपूर्ण रह्यो । केन एक्लैले दुई गोल गरेपछि इङ्ल्यान्डले रुस विश्वकपको आफ्नो पहिलो खेलमा ट्युनिसियालाई २-१ गोलले पराजित गरेको थियो ।
इङ्ल्यान्डका लागि यो विश्वकप फुटबलको पहिलो खेलमा जितसहित सुखद सुरुआत गरेको पछिल्लो १२ वर्षकै पहिलो अवसरसमेत रह्यो । खेल १-० गोलको बराबरीतर्फ अघि बढिरहेको अवस्थामा इन्जुरी समयको पहिलो मिनेटमा केनले नै निर्णायक गोल गर्दै टोलीलाई महत्वपूर्ण तीन अंक दिलाएका थिए । कुनै पनि समय टोलीका लागि गोल गर्न सक्ने क्षमता भएका केनले खेलाडी र कप्तानको हैसियतमा यसपटक इङ्ल्यान्डलाई उपाधिसम्म डोहोर्याउन पनि सक्छन् ।
आफ्नो उचाइ, बलसँग खेल्न र प्राप्त अवसरलाई गोलमा परिणत गर्न सक्ने क्षमताका कारण उनी छोटो समयमै इङ्लिस राष्ट्रिय टोलीको मुख्य स्ट्राइकरका रूपमा स्थापित भएका हुन् । उनी आफ्ना दुवै खुट्टा चलाउन माहिर छन् । केन नजिक र टाढाको बललाई टाउको र खुट्टा दुवैको सहायताले गोल गर्न सक्ने सक्षम खेलाडी हुन् । घरेलु क्लब टोट्टनहामका मुख्य स्ट्राइकरसमेत रहेका उनीसँग क्लब स्तरकै भए पनि ठूला प्रतिस्पर्धामा सहभागी भएको अनुभव छ ।
उनले घरेलु इङ्लिस प्रिमियर लिगमा टोट्टनहामबाट लगातार पछिल्लो दुई सिजन गोल्डेन बुटसमेत जितेका छन् । उनले त्यही सफलता विश्वकपमा समेत दोहोर्याउने अपेक्षा गरिएको छ । सन् २०१५ मा राष्ट्रिय टोलीबाट डेब्यु गरेका केनले हालसम्म २५ खेलबाट १५ गोलसमेत गरेका छन् ।
प्रतिक्रिया दिनुहोस !
