भक्तपुर : भक्तपुरको सूर्यविनायक नगरपालिकाले आर्थिक वर्ष ०७५/७६ का लागि ७५ करोड रुपैयाँको बजेट सिलिङ प्रस्तुत गरेको छ ।
चालू आर्थिक वर्षमा ५३ करोडको बजेट प्रस्तुत गरेको सूर्यविनायक नपाले आगामी आर्थिक वर्षका लागि ७५ करोड रुपैयाँ बढीको बजेट प्रस्तुत गर्ने भएको हो ।
नपाको तेस्रो नगरसभामा नगर प्रमुख वासुदेव थापाले उक्त बजेट बराबरको नीति तथा कार्यक्रम प्रस्तुत गरेका छन् ।
सूर्यविनायक नपालाई प्रविधियुक्त नगर बनाउने दिशातर्फ आफूहरू अघि बढिरहेको जानकारी दिँदै उनले २३ वटा मुख्य शीर्षकमा नपाको नीति तथा कार्यक्रम अघि सारेका हुन् ।
सूर्यविनायक नपाले पूर्वाधार विकासलाई पहिलो प्राथमिकता दिएको छ । सडक तथा यातायात, भवन निर्माण र सिँचाइलाई क्रमशः दोस्रो, तेस्रो र चौथो प्राथमिकतामा राखिएको छ ।
भवन निर्माणअन्तर्गत नपाले नक्सापास गर्दा नै एक घर दुई रूख रोप्ने नीतिलाई अनिवार्य लागू गर्ने नपाले बताएको छ ।
जमिन बाँझो राखे जरिवाना
सूर्यविनायक नपाले जमिन बाँझो राख्ने नगरवासीलाई कारबाही गर्ने नीति अघि सारेको छ । आगामी आर्थिक वर्षको नीति तथा कार्यक्रममा नपाले जमिन बाँझो राख्न नपाइने नीति अवलम्बन गरी जमिन बाँझो राख्नेबाट जरिवाना असुल गर्ने उल्लेख गरेको हो ।
उसले नपाको आन्तरिक राजस्व बढाउन राजस्वको क्षेत्रको दायरालाई फराकिलो बनाउने भएको छ । ‘कर डर होइन, नगर विकासको भर हो’ भन्ने नारालाई अघि सार्दै सूर्यविनायक नपाले राजस्व तिर्ने करदातालाई सम्मान गर्ने नीति लिने बताएको छ ।
नगरपालिकाभित्र सञ्चालित हरेक व्यवसायलाई नपामा दर्ता हुनै पर्ने नीति तर्जुमा गरिएको नगर प्रमुख थापाले जानकारी दिए ।
सूर्यविनायक नपाले एक स्थानीय तह एक औद्योगिक ग्राम स्थापना गर्ने संघीय सरकारको नीतिअनुरूप आफ्नो नगर क्षेत्रमा औद्योगिक ग्राम स्थापना गर्ने नीति लिने बताएको छ ।
नगर प्रमुख थापाले औद्योगिक ग्राम स्थापनाका लागि स्थान पहिचान गरी त्यहाँ भौतिक पूर्वाधार निर्माण गर्न नपा प्रतिबद्ध रहेको सुनाए ।
‘नपाभित्र औद्योगिक ग्राम स्थापना गरी उद्योगीलाई उद्योग सञ्चालन गर्न प्रोत्साहित गरिनेछ’, उनले भने, ‘नगरभित्रका साना तथा मझौला उद्योगीलाई आकर्षण गर्न विशेष कार्यक्रमको व्यवस्था गरिनेछ ।’
प्रतिक्रिया दिनुहोस !
