मस्को : जारी विश्वकपमा ‘ए’ मात्र यस्तो समूह हो, जुन समूहबाट अन्तिम खेलअगावै नकआउट चरणमा पुग्ने दुवै टोलीको टुंगो लागिसकेको छ । यो समूहबाट आयोजक रुस र दुई पटकको विश्वकप विजेता उरुग्वे यसअघि नै नकआउट चरणमा पुग्ने टुंगो लागिसकेको छ । बलियो मानिएको मोहमद सलाहको टोली इजिप्ट र एसियाली टोली साउदी अरेबिया भने पहिलो समूहगत चरणबाटै घर फर्कने पनि निश्चित भइसकेको छ ।
यस्तो अवस्थामा सोमबार दुई बलिया टोली रुस र उरुग्वे तथा दुई कमजोर देखिएका टोली साउदी र इजिप्टबीच समूहगत चरणको अन्तिम खेल हुँदैछ । साउदी र इजिप्टबीचको खेलले तालिकाको समीकरणमा कुनै असर नपारे पनि उनीहरू सान्त्वना जितका लागि प्रयासरत रहन छन् । उनीहरूका लागि यो खेल प्रतिष्ठाका लागि मात्रै महत्वपूर्ण रहनेछ तर, रुस र उरुग्वेबीचको खेलले भने नकआउट चरणको समीकरणमा ठूलै असर पार्नेछ।
रुस र उरुग्वेबीचको खेलले समूह विजेता र उपविजेताको टुंगो लगाउनेछ । उक्त खेलमा जित हात पार्ने टोली समूहको विजेता र हार्ने टोली उपविजेता बन्दै नकआउट चरणमा प्रवेश गर्नेछन् । प्रतियोगिताको प्रिक्वार्टरफाइनलमा भने समूह ‘ए’ को विजेताले समूह ‘बी’ को उपविजेता र समूह ‘ए’ को उपविजेताले समूह ‘बी’ को विजेतासँग प्रतिस्पर्धा गर्नु पर्नेछ ।
विश्वकप सुरु हुनुअघि खासै लयमा नदेखिएका कारण आफ्नै समर्थकको आलोचना खेप्दै आएको रुसले प्रतियोगिताको पहिलो र दोस्रो खेलमा भने अपत्यारिलो प्रदर्शन गरेको छ । अघिल्ला दुई खेलमै रुसले विपक्षीको पोस्टमा आठ गोल ठोकिसकेको छ । आफ्नो पहिलो खेलमा साउदीलाई ५-० गोलले हराएर घरेलु मैदानमा आफ्नो प्रभाव देखाएको रुसले दोस्रो खेलमा इजिप्टलाई ३-१ गोलले जिल्याएको थियो ।
यसैगरी आफ्नो पहिलो खेलमा सलाहबिनाको इजिप्टमाथि १-० गोलको प्रतिस्पर्धात्मक जित हात पारेको उरुग्वेले दोस्रो खेलमा पनि साउदीलाई १-० गोलले मात्र हराउन सकेको थियो । लुइस स्वारेज, एडिन्सन काभानी, डिएगो गोडिन, जोसे जिमेन्जजस्ता प्रभावशाली खेलाडीको साथ पाए पनि उरुग्वेले अघिल्ला दुई खेलमा आफ्नो क्षमताअनुसारको प्रदर्शन भने गर्न सकेको छैन ।
यसको विपरीत अघिल्ला दुई खेलमा रुसको प्रदर्शन भने निकै आक्रामक र स्तरीय देखिएको छ । सशक्त प्रदर्शन गरेका रुसका डेनिस चेरिसेभले अघिल्ला दुई खेलमा टोलीका लागि तीन गोल गरिसकेका छन् । विश्वकपमा यी दुईबीच पहिलो पटक भिडन्त हुन लागेको हो ।
प्रतिक्रिया दिनुहोस !
