गौर : रौतहटका १८ स्थानीय तहमध्ये तीन नगरपालिकाले मात्र आइतबार नगरसभा सम्पन्न गरेका छन् । गौर, परोहा र मौलापुर नगरपालिकाले मात्र आइतबार नगरसभा सम्पन्न गरेका हुन् । स्थानीय तह सञ्चालन ऐनमा असार १० गते नगर तथा गाउँसभा गर्न नसके १५ दिनभित्र सम्पन्न गर्नुपर्ने उल्लेख छ ।
आइतबार साँझसम्म तीन नगरपालिकाले मात्र नगरसभा सम्पन्न गरेको जानकारी आएको जिल्ला समन्वय समिति रौतहटका आन्तरिक लेखा अधिकृत कृतिराज सुवेदीले जानकारी दिए । चन्द्रपुर, वृन्दावन, गुजरा, फतुवा विजयपुर, राजदेवी, गढीमाई, गरुडा, बौधीमाई, राजपुर, देवाहीगोनाही, कटहरिया, इशनाथ, माधवनारायण नगरपालिका र यमुनामाई तथा दुर्गाभगवती गाउँपालिकाको सभा हुन नसकेको हो ।
राजपुरमा प्रमुख अतिथिको समय अभावका कारण १५ गतेलाई सारिएको मेयर शेष वकिलले जानकारी दिए । नगरसभामा प्रतिनिधिसभाका सांसद मो. अफ्ताब आलमलाई निम्तो गरिएको छ । कटहरियामा मौसमअनुकूल नभएका कारण आइतबार नगरसभा रोकिएको छ । राजदेवीमा सोमबार बैठक बसी सभाको मिति टुंगो लगाइने उपमेयर अंशु सिंहले जानकारी दिइन् । चन्द्रपुरमा नगरसभाको तयारी भरहेको कार्यकारी अधिकृत सुरेश दाहालले जानकारी दिए । गुजरामा असार २५ गते सभा गर्ने तयारी छ भने फतुवा विजयपुरमा मेयर र उपमेयरबीच विवादका कारण नगरसभा अन्योलमा छ ।
दुर्गाभगवतीमा असार २० गतेभित्र सभा गर्ने तयारी रहेको गाउँपालिकाका अध्यक्ष अरुणकुमार साहले बताए । यमुनामाईमा कार्यकारी अधिकृत नभएका कारण गाउँसभा गर्न ढिलाइ भएको अध्यक्ष श्रीप्रसाद मुखियाले सुनाए ।
१५ स्थानीय तहले असार मसान्तसम्ममा सभा सम्पन्न गर्ने तयारी गरिरहेको आन्तरिक लेखा अधिकृत सुवेदीले बताए । असारसम्म नगर÷गाउँसभा सम्पन्न नगरे साउनदेखि खर्च गर्ने बजेट पेस्की विधेयकबाट ल्याउनुपर्ने प्रावधान छ ।
प्रतिक्रिया दिनुहोस !
