इरानी फ्यानको चाल: रोनाल्डोसहित पोर्चुगलका खेलाडीलाई रातभर सुत्न दिएनन्
मस्को: विश्वकप फुटबल प्रतियोगिता अन्तर्गत सोमबार राति इरानले क्रिस्टियानो रोनाल्डो नेतृत्वको पोर्चुगलसँग सामना गर्दैछ । यो प्रतियोगिता भन्दा पहिले आइतवार राति सयौँ इरानी फुटबल प्रशंसकहरु पोर्चुगलका खेलाडीको निद्रा बिथोल्न होटल पुगेका छन् ।
मध्यराति जम्मा भएर पुगेका इरानका सयौँ फ्यानको चर्को नाचगान कारण क्रिस्टियानो रोनाल्डो होटलको झ्याल खोल्न बाध्य भएको समाचार अन्तर्राष्ट्रिय सञ्चारमाध्यमले लेखेका छन् ।
पोर्चुगलको टेलिभिजन ‘आरटीपी’ ले आफ्नो एक समाचारमा आफ्ना फुटबल सुपरस्टार क्रिस्टियानो रोनाल्डो होटलको झ्यालमा आएर इरानी प्रशंसकलाई शान्त हुन आग्रह गर्दै गरेको दृश्य देखाएको छ । यसका बाबजुत सोमवार बिहान पनि मस्कोको सरान्स्क सिटी सेन्टरमा अवस्थित होटल नजिकै इरानी प्रशंसकहरुले चर्को आवाजमा संगीत बजाउँदै नाचागान गरेका थिए ।
इरान विश्व कपको अघिल्लो चरणमा पोर्चु्गललाई हराएपछि मात्रै पुग्न सक्छ । अर्कातिर पोर्चुगललाई भने अघि बढ्नका लागि बराबरी गरे पनि पुग्छ । तर पोर्चुगल जितेर समूह विजेता हुने लक्ष्यसहित मैदानमा उत्रिनेछ ।
स्थानीय पुलिसले राति ११ बजे आफूहरुलाई होटल नजिकै होहल्ला गरिएको सूचना आएको जनाएको छ। इरानी प्रशंसक होटल बाहिर ठुलो ठुलो स्वरमा गीत गाइरहेका थिए । त्यसपछि रोनाल्डो होटल बाहिर आएर उनीहरुलाई शान्त हुन अपिल गरेका थिए ।
तर त्यसको केही बेरमा भिड जम्मा भएर कयौँ घण्टासम्म हल्ला गरिरहे । यति भएपछि पुलिसले होटल आसपासको सडक पनि बन्द गर्यो तर इरानी समर्थकहरु सानो सानो समूहमा आएर होटल बाहिर हल्ला गर्न छाडेनन् ।