मस्को : रुस विश्वकपको समूह ‘सी’अन्तर्गत मंगलबार हुने खेलमा प्रिक्वार्टरफाइनल चरणको झिनो आशासहित एसियाली क्षेत्रबाट छनोट भएको अस्ट्रेलियाले पेरुसँग प्रतिस्पर्धा गर्दैछ । यो खेलबाट प्रिक्वार्टरफाइनल चरणको यात्रा सम्भव बनाउन अस्ट्रेलियाले पेरुलाई पराजित गरेर मात्रै पुग्ने छैन । मंगलबार सोही समयमा हुने अर्काे खेलमा डेनमार्क पनि फ्रान्ससँग पराजित हुनै पर्नेछ र त्यसपछि पनि गोलअन्तरमा अस्ट्रेलिया अघि भएको हुनुपर्नेछ ।
मुस्किल देखिएको यही नतिजा सम्भव भएको अवस्थामा मात्रै अस्ट्रेलिया १२ वर्षपछि विश्वकप फुटबलको प्रिक्वार्टरफाइनल चरणमा पुग्नेछ । अस्ट्रेलिया यस अघि एक पटक मात्रै सन् २००६ मा विश्वकपको अन्तिम १६ मा पुगेको छ । त्यसबाहेक यसअघिको चारमध्ये तीन विश्वकपमा अस्ट्रेलिया समूहगत चरणबाटै बाहिरिएको छ ।
समूह सीबाट फ्रान्स यसअघि नै प्रिक्वार्टरफाइनल चरणमा पुगिसकेको छ भने पेरु बाहिरिसकेको छ । यो अवस्थामा अन्तिम खेलअघि प्रिक्वार्टरफाइनल चरणको सम्भावना रहेको डेनमार्कसँग चार र अस्ट्रेलियासँग मात्र एक अंक छ ।
प्रतियोगिताबाट बाहिरी सकेकाले कुनै पनि दबाबरहित देखिएको पेरुले अस्ट्रेलियाविरुद्ध जितको नतिजा निकाल्न पनि सक्नेछ । पेरु विजयी भएको अवस्थामा वा अर्काे खेलमा डेनमार्कले फ्रान्ससँग बराबरी मात्रै खेलेको अवस्थामासमेत अस्ट्रेलियाको प्रिक्वार्टरफाइनल चरणको सम्भावना समाप्त हुने छ । फ्रान्ससँग पराजित हुनुका बाबजुद गोलअन्तरमा अघि रहेको अवस्थामा समेत अस्ट्रेलियाको कुनै सम्भावना रहन्न । त्यसपछि फ्रान्स समूह विजेता र डेनमार्क उपविजेताको रूपमा प्रतियोगिताको नकआउट चरणमा पुग्नेछन् ।
विश्वकपमा यसअघि भएको प्रतिस्पर्धाको नतिजालाई हेर्दा फ्रान्स र डेनमार्कको अवस्था उस्तै देखिएको छ । विश्वकपमा यसअघि एकअर्काविरुद्ध दुई पटक प्रतिस्पर्धा गर्दा डेनमार्क र फ्रान्सले एक÷एक खेल जितेका छन् । यी खेलमा डेनमार्कले फ्रान्सविरुद्ध तीन गोल गरेको छ भने फ्रान्सले मात्रै दुई गोल गरेको छ । अस्ट्रेलिया र पेरु भने विश्वकपमा पहिलो पटक भिड्न लागेका हुन् ।
प्रतिक्रिया दिनुहोस !
