वासिङ्टन : अमेरिकी राष्ट्रपति डोनाल्ड ट्रम्पले जोडगर्दै आएजस्तै मुस्लिम बाहुल्य देशसहित विभिन्न ८ देशका नागरिकलाई अमेरिका प्रवेशमा रोक लागेको छ। राष्ट्रपति ट्रम्पले आफ्नो निर्वाचनको एजेण्डाका रुपमा यो एजेण्डा अघि सारेका थिए । यसअघि लगाइएको प्रतिबन्धलाई अमेरिकी सर्वोच्च अदालतले सदर गरिदिएको छ।
राष्ट्रपति ट्रम्पले गत वर्ष नै यी आठ देश सिरिया, लिबिया, इरान, यमन, चाड, सोमालिया, उत्तर कोरिया र भेनेजुएलाका नागरिकलाई अमेरिका प्रवेशमा रोक लगाएको आदेशात्मक कानुन बनाएका थिए ।
त्यस कानुनलाई अमेरिकाका विभिन्न तहका अदालतले बदर गरिदिएका थिए। त्यसपछि यस मुद्धा सर्वोच्च अदालत पुगेको थियो। मङ्गलबार अमेरिकी सर्वोच्च अदालतले ट्रम्पको निर्णय सदर गरिदिएको छ । यो मुद्धाको फैसला न्यायाधीशको बहुमत सङ्ख्याको आधारमा गरिएको बताइएको छ ।
विश्वका केही देश, मानवअधिकारवादी र अमेरिकी अधिकारवादीहरुले यसरी कुनै निश्चित देशका नागरिकलाई अमेरिका छिर्न नपाउने भनी गरेको निर्णयको विरोध गरेका थिए।
उक्त मुद्धाको फैसलामा ४ जना न्यायाधीशले सदर गर्न नहुने अडान लिएका थिए भने ५ जनाले भने ती मुस्लिम बाहुल्य भएका ६ र अरु २ गरी ८ देशका नागरिकलाई अमेरिका छिर्न प्रतिबन्ध लगाउनुपर्ने पक्षमा मत राखेका थिए।
ट्रम्प अमेरिकी राष्ट्रपतिमा निर्वाचित भएपछि उनले गरेका थुप्रै निर्णयहरू विवादमा परेका छन । अधिकांश त बदर नै भइरहेका छन्।
तर यो फैसला भने ट्रम्पको पक्षमा आएको छ। अमेरिकी सञ्चारमाध्यमहरुले यो पछिल्लो फैसलालाई ट्रम्पको अहिलेसम्मकै ठूलो जितका रुपमा पनि लिएका छन्।
(रासस/एएफपी
प्रतिक्रिया दिनुहोस !
