मस्को : रुस विश्वकपमा समूह ‘जी’बाट प्रिक्वार्टरफाइनल चरणमा पुग्ने र बाहिरिने टोलीको टुंगो यसअघि नै लागिसकेको छ । त्यसैले बिहीबार राति हुने खेलमा इङ्ल्यान्ड र बेल्जियमले समूह विजेता बन्नका लागि प्रतिस्पर्धा गर्दा सोही समय ट्युनिसिया र पानामा पहिलो अंकका लागि एकअर्काविरुद्ध ओर्लने छन् ।
अघिल्लो दुईमध्ये दुवै खेलमा जित हात पारेको इङ्ल्यान्ड र बेल्जियमको समान ६ अंक छ । यी दुई टोलीले समूहगत चरणको अघिल्लो दुई खेलमा विपक्षीविरुद्ध गरेको र बेहोरेको गोल संख्या पनि समान छन् ।
त्यसैले बिहीबार हुने खेलले मात्र इङ्ल्यान्ड र बेल्जियममध्ये समूह विजेता र उपविजेता टोलीको टुंगो लगाउनेछ । इङ्ल्यान्डले आफ्नो पहिलो खेलमा ट्युनिसियालाई २-१ र दोस्रो खेलमा पानामालाई ६-१ गोलले पराजित गरेको थियो । बेल्जियमले भने पहिलो खेलमा पानामालाई ३-० र ट्युनिसियालाई ५-२ गोलले पाखा लगाएको थियो ।
समूहमा पहिलो पटक विश्वकप खेलिरहेको पानामा र ट्युनिसिया तुलनात्मक रुपमा कमजोर देखिएकाले इङ्ल्यान्ड र बेल्जियमबीचको खेल दुबै टोलीका लागि आफ्नो क्षमता जाँच्ने महत्वपूर्ण अवसर पनि हुनेछ ।
विश्वकपमा यसअघि यी दुई टोलीबीच भएको प्रतिस्पर्धाको नतिजाले भने इङ्ल्यान्डलाई नै बलियो देखाएको छ । विश्वकपमा हालसम्म दुई पटक प्रतिस्पर्धा गर्दा इङ्ल्यान्ड अपराजित छ । एक खेलमा इङ्ल्यान्ड विजयी भएको छ भने अर्काे खेल बराबरीमा टुंगिएको छ।
यसैगरी अघिल्लो दुईमध्ये दुबै खेलमा पराजय बेहोरेका ट्युनिसिया र पानामाका लागि पनि बिहीबारको खेल जितसहित विश्वकप यात्रा सुखद् रुपमा टुंग्याउने गतिलो अवसर हो ।
जित वा बराबरीको नतिजा पानामाका लागि अझ विशेष हुने पक्का छ । पहिलो पटक विश्वकपका लागि छनोट भएको पानामाले आफ्नो अघिल्लो दुईमध्ये इङ्ल्यान्डविरुद्ध दुई गोल गरे पनि जित सम्भव भएको थिएन । त्यसका लागि यो खेल पानामालाई अन्तिम अवसर हुनेछ ।
प्रभाव पार्न सक्ने खेलाडी
जेसी लिनगार्ड (इङ्ल्यान्ड)
युवा खेलाडी जेसी लिनगार्ड रुस विश्वकपमा इङ्लिस टोलीका महŒवपूर्ण खेलाडी हुन् । घरेलु क्लब म्यानचेस्टर युनाइटेडको एकेडेमीमा हुर्किएका लिनगार्ड क्षमतावान् खेलाडी हुन् । उनी अन्य स्ट्राइकरलाई अवसर सिर्जना गर्न र आफैं गोल गर्न पनि सक्षम छन् । इङ्ल्यान्डले जारी विश्वकपमा पानामाविरुद्धको खेलमा ६–१ गोलको जित निकाल्दा लिनगार्डले पनि एक गोल गरेका थिए ।
मिडफिल्डमा विपक्षी रक्षकलाई झुक्याएर बल अगाडि बढाउन माहिर लिनगार्डसँग युरोपकै ठूलामध्ये इङ्लिस प्रिमियर लिगबाट उच्चस्तरको प्रतियोगिता खेलेको अनुभव छ । २५ वर्षीय लिनगार्ड जोसे मोउरिन्होले प्रशिक्षकको जिम्मेवारी सम्हालेपछि म्यानचेस्टर युनाइटेडको नियमित र महŒवपूर्ण खेलाडी रहँदै आइरहेका छन् । क्लब फुटबलमा गरेको सशक्त प्रदर्शनसँगै उनले राष्ट्रिय टोलीमा पनि गतिलो स्थान बनाएका छन् ।
त्यसो त उनले इङ्ल्यान्डका प्रशिक्षक गारेथ साउथगेटलाई उमेरसमूहको प्रतिस्पर्धाबाटै प्रभावित पारिसकेका थिए । इङ्लिस टोलीको मुख्य प्रशिक्षक नियुक्त हुनु अघि गाउथगेट इङ्ल्यान्डको यू–२१ टोलीका प्रशिक्षक थिए । सोही समयदेखि नै लिनगार्ड साउथगेटको महŒवपूर्ण खेलाडी थिए । सन् २०१६ को अक्टोबरमा माल्टासँगको खेलमा इङ्लिस टोलीबाट डेब्यु गरेका उनी त्यसयता नियमित सदस्य रहँदै आएका छन् ।
हालसम्म राष्ट्रिय टोलीबाट १४ खेल खेलेका लिनगार्डले दुई गोल पनि गरिसकेका छन् । समूहगत चरणमा सशक्त प्रदर्शन गर्दै इङ्ल्यान्डले यस पटक उपाधिकै दाबेदारी प्रस्तुत गरिरहँदा टोलीको यो अभियानमा लिन्गार्डको भूमिका अझ महŒवपूर्ण रहने विश्वास गरिएको छ ।
मारिउन फेलानी (बेल्जियम)
म्यानचेस्टर युनाइटेडकै खेलाडी मारिउन फेलानी पनि आफ्नो टोली बेल्जियमका महत्वपूर्ण खेलाडी हुन् । शरीरको उचाइ, खेल्ने शैली र कुनै पनि पोजिसनबाट खेल्न सक्ने क्षमताका कारण फेलानी क्लब र राष्ट्रिय टोलीमा सधैं चर्चामा रहँदै आएका छन् । विशेषगरी मिडफिल्डबाट खेल्ने फेलानी अन्य पोजिसनबाट खेल्न पनि उत्तिकै सक्षम छन् । उनी ती पोजिसनबाट गोलको अवसर सिर्जना गर्न र आफैंले पनि गोल गर्न सक्छन् ।
सन् २०१४ मा ब्राजिलमा भएको विश्वकपमा आफ्नो टोलीका लागि आवश्यक परेको समयमा गोल गर्दै अघि बढाएका फेलानीले रुस विश्वकपमा भने त्यो प्रदर्शनलाई दोहोर्याउन बाँकी नै छ । लामो समय इङ्ल्यान्डको एभर्टन र म्यानचेस्टर युनाइटेडबाट व्यावसायिक फुटबल खेलेका उनी टोलीका अनुभवी खेलाडी पनि हुन् । उनको त्यही क्षमता, अनुभव र मेहनत रुस विश्वकपमा बेल्जियलाई उपाधिसम्म डोहोर्याउन महत्वपूर्ण सावित हुने विश्वास गरिएको छ ।
बेल्जियम सदाबहार राम्रो टोली भए पनि विश्वकप फुटबलमा भने सधंै उपाधिसम्म पुग्नुअघि नै बाहिरिने गरेको छ । यस पटक पनि बेल्जियमले समूहगत चरणको खेलसम्म सशक्त प्रदर्शन गरेको छ । यो टोलीलाई पहिलो पटक विश्वकपको उपाधि दिलाउने अभियान सफल बनाउन फेलानीले पनि महत्वपूर्ण भूमिका निर्वाह गर्ने अनुमान गरिएको छ । बेल्जियमको राष्ट्रिय टोलीबाट ८३ खेल खेलिसकेका ३० वर्षीय फेलानीले हालसम्म १७ गोल गरेका छन् ।
प्रतिक्रिया दिनुहोस !
