मस्को : रुस विश्वकपको समूहगत चरणका अघिल्ला दुई खेलमा एसियाली टोलीमध्ये सशक्त प्रदर्शन गरेको जापानले बिहीबार युरोपेली प्रतिद्वन्द्वी पोल्यान्डसँग महत्वपूर्ण खेल खेल्दैछ । अघिल्लो दुई खेलबाट महत्वपूर्ण चार अंक बटुलेको जापानलाई प्रिक्वार्टरफाइनलको यात्रा तय गर्न समूहगत चरणको आफ्नो अन्तिम खेलबाट केवल एक अंक आवश्यक देखिएको छ ।
त्यसैले पोल्यान्डविरुद्ध प्रतिस्पर्धा गर्दा जापानको लक्ष्य कम्तीमा एक अंक हात पार्नु हुनेछ । यो नतिजाले जापानलाई तेस्रो पटक विश्वकपको प्रिक्वार्टरफाइनल चरणमा पुर्याउने निश्चित छ । जापान सन् २००२ मा आफ्नै देशले आयोजना गरेको र सन् २०१० मा दक्षिण अफ्रिकाले आयोजना गरेको विश्वकपमा पनि प्रिक्वार्टरफाइनलसम्म पुगेको थियो ।
त्यही इतिहास दोहोर्याउन जापानले पोल्यान्डविरुद्ध सशक्त प्रदर्शन गर्ने अनुमान गरिएको छ । यद्यपि पोल्यान्डसँगको खेलमा जापानको लक्ष्य बराबरीभन्दा माथिको हुनेछ । पोल्यान्डलाई पराजित गर्न सकेमा जापान समूह ‘एच’ को विजेता टोलीको हैसियतमा नकआउट चरणमा पुग्ने सम्भावना रहन्छ । समूह विजेता बन्ने टोलीलाई प्रिक्वार्टरफाइनलमा अर्काे समूहको उपविजेता टोलीसँग प्रतिस्पर्धा गर्न पाउने अवसर हुन्छ ।
तर, जापानले पोल्यान्डलाई कमजोर आँक्ने गल्ती भने पक्कै पनि गर्ने छैन । पोल्यान्डविरुद्धको पराजयले जापानको यात्रा समूहगत चरणमै रोकिन पनि सक्छ । अघिल्लो दुईमध्ये सेनेगल र कोलम्बियाविरुद्धको दुवै खेलमा पराजय व्यहोरेपछि पोल्यान्ड समूहगत चरणबाटै घर फर्कने निश्चित भइसकेको छ । त्यसैले पोल्यान्ड अन्तिम खेलमा जितसहित प्रतियोगिता टुंग्याउन चाहन्छ । त्यसैले रोबर्ट लेवान्डोवस्कीसहित युरोपेली क्लब फुटबलमा स्थापित खेलाडीको साथ पाएको पोल्यान्ड पनि जापानविरुद्ध जित निकाल्ने धुनमा रहने निश्चित छ ।
सोही समूहको अर्काे खेलमा जेम्स रोड्रिगेजको टोली कोलम्बियालाई भने केही मुस्किल देखिएको छ । प्रिक्वार्टरफाइनल चरणको यात्रा तय गर्न कोलम्बियालाई कुनै पनि अवस्थामा सेनेगललाई पराजित गर्नुपर्ने बाध्यता थपिएको छ । पराजय वा बराबरीको नतिजाले पनि कोलम्बियाको यात्रा पहिलो चरणमै टुंगिनेछ । गत संस्करणमा रोड्रिगेजकै उत्कृष्ट प्रदर्शनमा क्वार्टरफाइनलसम्म पुगेको कोलम्बिया यस पटक भने समूहगत चरणमै संकटमा परेको छ ।
कोलम्बियाले समूहगत चरणको आफ्नो पहिलो खेलमा जापानसँग पराजय व्यहोरेको थियो भने दोस्रो खेलमा पोल्यान्डलाई हराएको थियो । जापानसँग बराबरी र पोल्यान्डलाई पराजित गर्दै चार अंक बटुलेको सेनेगललाई भने प्रिक्वार्टरफाइनल चरणमा पुग्न बराबरीको नतिजा नै पर्याप्त हुनेछ । एकै समयमा हुने यी दुवै खेल बराबरीमै रोकिँदा जापान र सेनेगल अन्तिम १६ मा पुग्नेछन् । विश्वकपमा पोल्यान्ड र जापान तथा सेनेगल र कोलम्बिया पहिलो पटक भिड्न लागेका हुन् ।
प्रतिक्रिया दिनुहोस !
