काठमाडौं : आगामी वर्षदेखि माध्यमिक शिक्षा परीक्षा (एसईई) सात वटै प्रदेशबाट सञ्चालन हुने भएको छ । यो व्यवस्था कार्यान्वयनमा आएपछि अहिले जस्तो केन्द्रीकृत रूपमा परीक्षा सञ्चालन गर्ने पद्दति अन्त्य हुनेछ ।
परीक्षा सञ्चालनदेखि नतिजा प्रकाशनलगायत केन्द्रले मात्र गर्दै आएको सबै काम सात वटा प्रदेशमा विभाजन भएपछि नतिजा प्रकाशन पनि छिटो हुनेछ । परीक्षा सञ्चालन भने राष्ट्रिय परीक्षा बोर्डले नै गर्नेछ । शिक्षा ऐन संशोधन भएर तत्कालीन उच्च माध्यमिक शिक्षा परिषद् खारेज भएपछि बोर्ड गठन भएको थियो । संशोधित ऐनमा बोर्डमार्फत् कक्षा १२ को परीक्षा केन्द्रीय स्तरमा र कक्षा १० को अन्त्यमा लिइने एसईई परीक्षा प्रादेशिक स्तरबाट सञ्चालन गर्ने उल्लेख छ । कक्षा ११ को परीक्षा भने सम्बन्धित विद्यालय नै सञ्चालन गर्न पाउनेछन् ।
ऐन संशोधन भएको दुई वर्ष बित्न लाग्दा पनि बोर्डले पूर्णता नपाउँदा साविकको परीक्षा नियन्त्रण कार्यालयमार्फत् केन्द्रबाटै एसईई परीक्षा सञ्चालन भइरहेको छ । बोर्डकै अनुरोधमा पनिकाले परीक्षा सञ्चालन गरिदिएको थियो ।
‘अर्को वर्षदेखि हामी आफंै परीक्षा सञ्चालन गर्छौं’, बोर्डका अध्यक्ष प्राडा. चन्द्रमणि पौडेलले भने, ‘बोर्डको प्रादेशिक संरचना स्वीकृतीका लागि शिक्षा मन्त्रालय पठाएका छौं । एक वर्षभित्र कार्यालय स्थापना र कर्मचारी भर्तीलगायत सबै काम पूरा गरिसक्छौं ।’ बोर्डले अहिले कक्षा ११ र १२ को परीक्षा सञ्चालन गरिरहेको छ । अहिले बोर्डका ११ वटा क्षेत्रीय कार्यालय छन् । मन्त्रालयमा पठाइएको प्रस्तावमा १८ वटा क्षेत्रीय कार्यालय स्थापना गर्ने उल्लेख छ ।
पुरक एसईई पनि बोर्डबाटै
आगामी साउन २७ गते सञ्चालन हुने पुरक एसईई पनि राष्ट्रिय परीक्षा बोर्डबाट सञ्चालन हुने भएको छ । एसईईकै वार्षिक परीक्षा सञ्चालन गरेर नतिजा सार्वजनिक गरेको परीक्षा नियन्त्रण कार्यालय साउन १ देखि नरहने भएकाले बोर्डले नै परीक्षा सञ्चालन गर्न लागेको हो ।
परीक्षा नियन्त्रक अम्बिका रेग्मीसहितको टोलीले बुधबार बोर्ड अध्यक्ष चन्द्रमणि पौडेलसँग भेटेर यसबारे जानकारी गराएको छ । पौडेलसँग भेटेपछि परीक्षा नियन्त्रक रेग्मीले भने, ‘हामीलाई असार मसान्त (चालु आव) को लागि मात्र बजेट छुट्टयाइएको छ । त्यसपछि के गर्ने भन्ने कुनै जानकारी आएको छैन । यही कुरा बोर्ड अध्यक्षलाई जानकारी गराएका हौं ।’
शिक्षा मन्त्रालयको सांगठनिक संरचनाअनुसार हालको पनिका, शिक्षा विभाग, शैक्षिक जनशक्ति विकास केन्द्रलगायत निकाय साउन १ बाट स्वतः खारेजी हुनेछन् । कक्षा १२ सम्मको शिक्षाको दायित्व स्थानीय तहमा गएकाले यी निकाय भूमिकाविहीन भएका थिए ।
सैद्धान्तिक विषयतर्फ सी, डी प्लस, डी र ई ग्रेड ल्याउने परीक्षार्थीले जति विषयमा सी ग्रेड र सोभन्दा तल्लो ग्रेड प्राप्त गरेको छ, तीमध्ये विद्यार्थीले चाहेको विषयमा ग्रेडवृद्धि (पूरक) परीक्षा दिन पाउने छन् । बोर्ड अध्यक्ष पौडेलले भने, ‘पुरक परीक्षा सञ्चालनका लागि आवश्यक तयारी शुरु गरिसकेका छौं ।’
प्रतिक्रिया दिनुहोस !
