जेलबाट निकालिदिने भन्दै १० लाख रुपैयाँ ठगी, एकजना पक्राउ

भैरहवाः ठगी गरेको आरोपमा प्रहरीले एकजनालाई पक्राउ गरेको छ । पक्राउ पर्नेमा नवलपरासी घर भइ हाल काठमाडौँ बस्ने ४८ वर्षीय राजेश गौड रहेका जिल्ला प्रहरी कार्यालय रुपन्देहीले जनाएको छ ।

प्रहरीका अनुसार अवैध हुण्डी कारोबारको विषयमा गत फागुन २८ गते भैरहवाका व्यवसायी हरिश सेठियालाई लक्षित गरी गोली प्रहार भएको घटनामा पक्राउ परेका भैरहवाका ४४ वर्षीय मोहन बनियाँलाई थुनामुक्त गराइदिने भन्दै गौडले बनियाँका आफन्तसँग १० लाख रुपैयाँ लिएर फरार भएका थिए ।

ठगी गरी फरार रहेका गौडलाई काठमाडौँबाट पक्राउ गरीरुपन्देही जिल्ला अदालतबाट ठगी मुद्दामा म्याद थप गरेर अनुसन्धान भइरहेको जिल्ला प्रहरी कार्यालय रुपन्देहीले जनाएको छ ।

घटनालगत्तै भाग्दाभग्दै पक्राउ परेका भारत नौतनवाका सुटर रमजान मुसलमानले गोली प्रहार गर्नका लागि आफुलाई मोहन बनियाँले सुपारी दिएको प्रहरीलाई बयान दिएका थिए । 

त्यही बयानको आधारमा प्रहरीले बनियाँलाई पक्राउ गरेको थियो । पछि प्रहरीले सुटरले बयान फेरेको भन्दै पक्राउ परेको बनियाँलाई जिल्ला सरकारी वकिल कार्यालय रुपन्देहीबाट मुद्दा चलाउन आवश्यक नदेखिएको भन्दै पर्चा खडा गरेर थुनामुक्त गरेको थियो । 

जसमा ठुलो रकमको चलखेल भएको थियो र बनियाँलाई थुनामुक्त गराउनका लागि उनको परिवारले पनि ठुलो रकम खर्च गर्न तयार रहेको थियो । त्यही क्रममा पक्राउ परेका गौडले थुनामुक्त गराइदिने भन्दै १० लाख रुपैयाँ लिएर फरार भएका थिए ।