वीरेन्द्रनगरः कर्णाली प्रदेशको एक मात्र विश्वविद्यालय मध्यपश्चिमाञ्चल विश्वविद्यालय सुर्खेतका विद्यार्थीहरुले उपकुलपतिको गाडीमा तोडफोड गरेका छन् । इन्जिनियरिङ्ग संकायलाई स्वायत्त र मर्यादित बनाउन माग राख्दै आन्दोलनमा रहेका विद्यार्थीहरुले शुक्रबार उपकुलपति प्रा.डा उपेन्द्रकुमार कोइरालाको गाडी तोडफोड गरेका हुन् ।
लगातार १२ दिनदेखि आन्दोलनमा रहेका विद्यार्थीहरुले केन्द्रिय कार्यालयमा लगाएको ताला आफुहरुसँगको सल्लाहबिना नै तोडिएपछि उनीहरुले परिषरमा रोकेर राखिएको गाडीमाथि अन्धाधुन्ध ढुंगामुडा गरी गाडी तोडफोड गरेका हुन् ।
विश्वविद्यालय पदाधिकारी र आन्दोलनरत विद्यार्थीबीच वार्ता बस्ने बारेमा सहमति हुन नसक्दा तोडफोड भएको हो । विश्वविद्यालय पदाधिकारीहरु आफ्ना मागप्रति जवाफदेही नभएको भन्दै विद्यार्थीहरुले एमयूको विस्तारित कार्यालयमा समेत ढुङ्गामुढा गरेका छन् ।
गाडी तोडफोड र विस्तारित कार्यालयमा ढुङ्गामुढा गर्ने ६ जना विद्यार्थीलाई जिल्ला प्रहरी कार्यालयबाट खटिएको प्रहरी टालिले पक्राउ गरी नियन्त्रणमा लिएको छ । एमयूको केन्द्रीय क्याम्पस परिषरमा रिले अनसन समेत बसेका छन् ।
विद्यार्थीहरु ढुंगामुडा गर्न उत्रिएपछि नियन्त्रणमा लिनुपरेको प्रहरीको भनाइ छ । प्रहरीका अनुसार निकुञ्ज पाण्डे, न्यूटन वली, रामचन्द्र भण्डारी, केशव खड्का, निर्मल विसी र रामकुमार शाह पक्राउ परेका छन् ।
हाइड्रोपावर इन्जिनियरिङ्गको पूर्ण पाठ्यक्रम उपलब्ध गराइनुपर्ने, गोल्डेन चान्स परीक्षाको व्यवस्था गरिनुपर्ने, सम्पूर्ण प्रयोगात्मक कक्षाहरू पूर्णरूपमा सञ्चालन गरिनुपर्ने र १० प्रतिशत विद्यार्र्थीलाई पूर्ण छात्रवृत्ति उपलब्ध गराइनुपर्ने लगायतका मागहरू विद्यार्थीले राखेका छन् ।
त्यस्तै लाइब्रेरीमा पर्याप्त पुस्तक उपलब्ध गराउनुका साथै, इन्जिनियरिङ्ग संकायको छुट्टै लाइब्रेरीको व्यवस्था गराइनुपर्ने, सम्पूर्ण विषयको विषयगत शिक्षकको उचित व्यवस्थापन गरिनुपर्ने माग उनीहरुका छन् ।
इन्जिनियरिङ्ग संकायलाई पूर्ण स्वायत्त बनाइनुपर्ने माग राख्दै मध्यपश्चिमाञ्चल विश्वविद्यालयको इन्जिनियरिङ्ग संघर्ष समितिले आन्दोलन थालेको हो ।
विभिन्न सात बँुदे मागसहितको ज्ञापनपत्रप्रति विश्वविद्यालय प्रशासन मौन देखिएकाले आन्दोलनमा उत्रिनु परेको संघर्ष समितिका सदस्य विज्ञानराज कार्कीले बताए । उनले विश्वविद्यालय पदाधिकारीहरुले विद्यार्थीका समस्या समाधान भन्दा पनि दमनपरी रुपमा ताला तोडेर विद्यार्थीमाथि दादागिरी देखाएको अरोप लगाएका छन् ।
यस्तै, विश्वविद्यालयले भने वार्ताका लागि तयार हुँदा हुँदै पनि विद्यार्थाीहरुले आक्रोशमा तोडफोड गरेको बताएको छ । जायज माग सम्बोधनका लागि विश्वविद्यालय तयार रहेको रजिष्ट्रार डा. महेन्द्रकुमार मल्लले बताए ।
वीरेन्द्रनगरः विद्यार्थीको ढुंगामुडाबाट सिसा फुटेको उपकुलपतिको गाडी ।
प्रतिक्रिया दिनुहोस !
