चरिकोट : दोलखालीका लागि आह्वान गरिएको माथिल्लो तामाकोसी जलविद्युत् आयोजनाको सेयरमा मिति सच्याउन माग गरिएको छ । पुनर्निर्माणको कारण थलिएका दोलखालीमा रकम, मौसम र समयको प्रतिकुल अवस्था हुने भएका कारण अपर तामाकोसी हाइड्रो पावर लिमिटेडले आह्वान गरेको सेयरमा बहुसंख्यक दोलखाली छुट्ने भएकाले यस्तो माग गरेका हुन् । बुधबार नागरिक समाज र बिहीबार संयुक्त सेयर संघर्ष समितिले ज्ञापन पत्र र प्रेस विज्ञप्तिमार्फत मिति सच्याउन माग गरेका हुन् । आयोजनाले मंगलबार सार्वजनिक सूचना प्रकाशन गरी असार २४ देखि साउन ९ गतेसम्म सेयर आवेदन गर्न आह्वान गरेको थियो ।
बहुसंख्यक दोलखालीले आफ्नो बचतको ठूलो हिस्सा निजी आवास पुनर्निर्माणमा लगानी गरेको अवस्था, आर्थिक वर्षको अन्त्य, बैंक तथा वित्तीय संस्थाहरूको कारोबार स्थगितको समय, वर्षा, बाढीपहिरो र खेतीको मुख्य मौसममा सेयर आह्वान हुँदा स्थानीयको पहुँच नहुने भन्दै फाराम भर्ने मिति सच्याउनु पर्ने संयुक्त सेयर संघर्ष समितिका संयोजक बर्मा लामाले बताए ।
नागरिक समाज चरिकोटका प्रतिनिधिहरू, नेपाल पत्रकार महासंघ र अधिकारकर्मीले प्रमुख जिल्ला अधिकारी सागरमणि पाठक र जिल्ला समन्वय समितिका प्रमुख डबल पाण्डेलाई बुधबार मिति सच्याउन ज्ञापन पत्र बुझाए भने माथिल्लो तामाकोसी सेयर संयुक्त संघर्ष समितिले बिहीबार प्रेस विज्ञप्ति जारी गर्दै फाराम भर्ने मिति सार्न माग गरे । उनीहरूले सेयर निष्कासनको प्रक्रिया तत्कालका लागि स्थगित गर्न र केही समयपछि पुनः आह्वान गरी सबैको लगानी सुनिश्चित हुने वातावरण तयार पार्न आग्रह गरे ।
दोलखालीले पाउने सेयर दोलखालीद्वारा नै वर्षायाम सकिएपछि मात्रै निष्कासन गर्न र सेयर आवेदन दिने समय कम्तीमा एक महिनाको हुनुपर्ने माग गरेका छन् । यस्तै, जिल्लाका सबै स्थानीय सरकारका वडा तहसम्म बैंक तथा वित्तीय संस्थासँग साझेदारी गरी सोहीमार्फत सरल र सहज ढंगले सेयर आवेदन फारम भर्ने व्यवस्था मिलाएर मात्रै सेयर निष्कासन गर्न आग्रह गरिएको छ । जिल्लाबाहिर रहेका दोलखालीले पनि सोही स्थानबाट सेयर भर्ने व्यवस्था मिलाउनु पर्ने, सेयर आह्वान गर्नुपूर्व सेयर आवेदन भर्ने विधि र प्रक्रियाबारे आमसञ्चार माध्यममार्फत सर्वसाधारणलाई जानकरी गराउनुपर्ने संघर्ष समितिको माग छ ।
प्रतिक्रिया दिनुहोस !
