मस्को : विश्वकप फुटबलको बिहीबार राति खेलिएको समूह ‘जी’ अन्तर्गतको खेलमा अफ्रिकी टोली ट्युनिसियाले पानामालाई २-१ गोलले हराएको छ । यी दुवै टोली यसअघि नै समूहगत चरणबाटै बाहिरिने निश्चित भइसके पनि पानामा विरुद्घको जित ट्युनिसियाका लागि निकै महत्वपूर्ण रह्यो । ट्युनिसियाले विश्वकप फुटबलमा ४० वर्षपछि पहिलो जित हासिल गरेको हो ।
ट्युनिसियाले सन् १९७८ मा पहिलोपटक विश्वकप खेलेको थियो । सोही विश्वकपमा ट्युनिसियाले बलियो प्रतिद्वन्द्वी मेक्सिकोलाई ३-१ गोलले हराएको थियो । त्यसयता विश्वकपमा ट्युनिसियाले गोल गर्न सकेको थिएन । सन् १९७८ मा मेक्सिकोलाई हराएपछि विश्वकपमा खेलिएको आफ्नो १३ वटा खेलमा ट्युनिसियाले जित हात पार्न सकेको थिएन । १३ मध्ये नौ खेलमा पराजित भएको ट्युनिसिया चार खेलमा भने बराबरीमा रोकिएको थियो । त्यसैले विश्वकपमा ट्युनिसियाको यो केवल दोस्रो जित हो ।
पानामाविरुद्घको खेलको ३३औं मिनेटमा यासिन मेरिहबाट आत्मघाती गोल भएपछि ट्युनिसिया दबाबमा परेको थियो । ५१औं मिनेटमा फाखरेद्दिन बेन युसेफले जवाफी गोल गर्दै ट्युनिसियालाई बराबरीमा फर्काएका थिए । प्रतिस्पर्धात्मक खेलको ६६औं मिनेटमा कप्तान वाहबी खाजरीले आकर्षक गोल गर्दै ट्युनिसियालाई विश्वकपमा ४० वर्षपछि जित दिलाएका हुन् ।
‘ट्युनिसियाका लागि यो निकै महत्वपूर्ण क्षण हो । निकै लामो समयपछि हामीले विश्वकपमा आफ्नो जित दर्ता गराएका छौं’, खेलपछि ट्युनिसियाका कप्तान बेन युसेफले भने । ट्युनिसियाका प्रशिक्षक नाबिल मालुलले पनि टोलीका लागि पानामाविरुद्घको जित गौरवको विषय भएको प्रतिक्रिया दिए । समूहगत चरणको आफ्नो पहिलो खेलमा ट्युनिसियालाई इङ्ल्यान्डले २-१ गोलले हराएको थियो दोस्रो खेलमा ट्युनिसियाको टोली बेल्जियमसँग ५-२ गोलले हारेको थियो ।
आफ्ना थुप्रै राम्रा खेलाडी घाइते भएका कारण विश्वकप सुरु हुनुअघि नै ट्युनिसिया दबाबमा थियो । घाइते भएका कारण डिफेन्डर डायलन ब्रोन टोलीमा थिएनन् भने सोही समस्याका कारण पहिलो र दोस्रो रोजाइका गोलरक्षक पनि विश्वकपमा अनुपस्थित थिए । पानामा भने सन् २००६ को विश्वकपछि समूहगत चरणका तीनवटै खेल हार्ने पहिलो टोली बनेको छ । सन् २००६ मा सर्विया र टोगोले समूहगत चरणका तीनवटै खेल हारेका थिए । यसैगरी रुसमा जारी विश्वकपको समूहगत चरणमा सहभागी ३२ वटै टोलीले कम्तीमा दुई÷दुई गोल गरेका छन् । विश्वकपको इतिहासमा यस्तो पहिलोपटक भएको हो ।
प्रतिक्रिया दिनुहोस !
