काठमाडौं : प्रकाश दाहाल स्मृति राष्ट्रिय बक्सिङ प्रतियोगितामा विभागीय टोलीका खेलाडीको वर्चश्व देखिएको छ । प्रतियोगिताको ४९ केजी तौल समूहमा त्रिभुवन आर्मी क्लबका सुशील थापा र एपीएफका आश तामाङ फाइनलमा पुगेका छन् । सेमिफाइनलमा सुशीलले एपीएफका प्रदीप महर्जनलाई हराए भने आशले कास्कीका विष्णु गौतमलाई पाखा लगाए ।
पुरुष ५२ केजीमा एपीएफका पुरन राई र कास्कीका दिनेश बानियाँ उपाधिका लागि भिड्ने भएका छन् । सेमिफाइनलमा पुरनले झापाका सुरेन्द्र राई र दिनेशले झापाका जितेन्द्र राईलाई पराजित गरे । ६० केजी तौल समूहको सेमिफाइनलमा आर्मीका दानबहादुर दर्लामीले नक्सालका किशोर शर्मालाई र झापाका प्रकाश लिम्बूले कञ्चनपुरका रामबहादुर थापालाई हराए । ६४ केजी तौल समूहको पहिलो सेमिफाइनलमा आर्मीका नरेश थापा एपीएफका सोनम कार्कीलाई हराउँदै फाइनलमा प्रवेश गरे । अर्को सेमिफाइनलमा झापाका अविनय राईले आर्मीका बुद्धिसागर गुरुङलाई पराजित गर्दै नरेशसँगको भिडन्त पक्का पारे ।
६९ केजीमा आर्मीका रवि सुनुवारले आफ्नै क्लबका सन्दीप बेन्जुलाई हराए । अर्को सेमिफाइनलमा कास्कीका हेमराज राउतले काठमाडौंका सरियान्स प्रजापतिलाई पराजित गर्दै फाइनलमा स्थान बनाए ।
पुरुषकै ७५ केजीमा बानुजका कौशलजंग थापाले आर्मीका लाल आलेमगरलाई र आर्मीका किरणराज शाहीले दमकका प्रेम गुरुङलाई हराउँदै फाइनल भिडन्त पक्का गरे ।
८१ केजीमा कास्कीका दीपक सुनुवारले आर्मीका कृष्णसिंह धामीलाई हराए । अर्को सेमिफाइनलमा आर्मीका भूपेन्द्र सिंहले टीकाथलीका रवीन्द्र घिमिरेलाई हराए ।
प्रतियोगिताको महिला ४८ केजी तौल समूहको स्वर्णका लागि एपीएफका दुई खेलाडी आमनेसामने हुनेछन् । नन्जा बुढामगरले आर्मीकी सुमित्रा विकलाई हराइन् भने सावित्री तामाङले अल्फाका विमला थापामगरलाई पराजित गरिन् ।
५२ केजी तौल समूहको पहिलो सेमिफाइनलमा मकवानपुरकी सञ्जुमाया थिङले आर्मीकी आरती तामाङलाई हराइन् । यस्तै अर्को सेमिफाइनलमा एपीएफकी माला राईले आर्मीकी गीताकुमारी थापालाई हराउँदै फाइनलमा पुगिन् ।
५४ केजी तौल समूहमा आर्मीकी मीनु गुरुङ र काठमाडौंकी मीना घले फाइनलमा पुगेका छन् । मीनुले एपीएफकी नीता गोसाईंलाई हराइन् भने मीनाले दमककी चन्द्रकला राईलाई पराजित गरिन् ।
५७ केजीमा आर्मीकी चन्द्रकला थापाले एपीएफकी माया चौधरीलाई र नक्सालकी कुसुम तामाङले आर्मीकी मुना बम्जनलाई हराइन् ।
६० केजीमा आर्मीकी सबिना श्रेष्ठ दमककी सोममाया लिम्बूलाई हराइन् भने ६४ केजीमा आर्मीकी विनीता मगरले नक्सालकी अम्बिका विकलाई र एपीएफकी विनीता थापामगरले भक्तपुरकी सरू ब्यन्जूलाई हराउँदै फाइनलमा स्थान बनाइन् ।
प्रतिक्रिया दिनुहोस !
