विश्वकप : आजका खेलमा प्रभाव पार्न सक्ने खेलाडी
इभान राकिटिच (क्रोएसिया)
इभान राकिटिच क्रोएसियाका महत्वपूर्ण खेलाडी हुन् । समूहगत चरणमा क्रोएसियालाई तीनमध्ये तीनै खेलमा जितसहित प्रिक्वार्टरफाइनल चरणमा पुर्याउन उनै राकिटिचले उत्कृष्ट प्रदर्शन गरेका थिए । राकिटिच यस्ता खेलाडी हुन्, जो मिडफिल्डबाट खेलेर नियमित रूपमा गोल गरिरहन्छन् । क्रोएसियाको टोलीको मिडफिल्डमा उनले कप्तान लुका मोड्रिचसँग निकै राम्रो तालमेल देखाउँदै आएका छन् ।
त्यही कारणले जारी प्रतियोगितामा क्रोएसिया उपाधिको दाबेदारमध्येको टोली बनेको छ । समूहगत चरणमा क्रोएसियाले बलियो अर्जेन्टिनालाई ३-० ले पराजित गर्दा राकिटिचले पनि एक गोल गरेका थिए । प्रतियोगितामा क्रोएसियाले यसपटक उपाधिको बलियो दाबेदारी प्रस्तुत गर्दा राकिटिचकै भूमिका महत्वपूर्ण हुने देखिएको छ । स्पेनी टोली बार्सिलोनाबाट व्यावसायिक फुटबल खेल्दै आइरहेका राकिटिच अनुभवका आधारमा पनि टोलीका मुख्य खेलाडी हुन् । अघिल्ला केही महत्वपूर्ण प्रतियोगितामा टोलीका लागि उनको योगदान त्यति उल्लेखनीय बन्न सकेको छैन ।
सन् २००८ को युरोकपमा उनै राकिटिचले पेनाल्टी प्रहार चुकाउँदा क्रोएसिया टर्कीसँग पराजित हुँदै क्वार्टरफाइनलबाटै बाहिरिएको थियो । सन् २०१२ को युरोकप र सन् २०१४ को विश्वकपमा पनि टोलीका लागि उनको योगदान गतिलो देखिएको थिएन । रुस विश्वकपको समूहगत चरणमा भने क्रोएसियाको सफलतामा उनको निर्णायक योगदान देखिँदै आएको छ । त्यसैले आगामी खेलमा पनि उनै राकिटिचले यस्तै योगदान पुर्याउँदा क्रोएसिया पहिलोपटक विश्वकप फुटबलको उपाधिसम्म पुग्ने अनुमान गरिएको छ । क्रोएसियाले सन् १९९८ मा फ्रान्समा भएको विश्वकपमा तेस्रो स्थान हात पार्नुबाहेक त्योभन्दा माथिको सफलता हात पार्न सकेको छैन । सन् २००७ देखि राष्ट्रिय टोलीबाट खेल्न थालेका राकिटिचले अहिलेसम्म ९५ खेलबाट १५ गोल गरेका छन् ।
डेभिड सिल्भा (स्पेन)
स्पेनिस राष्ट्रिय टोलीको ‘गोल्डेन जेनेरेसन’का महत्वपूर्ण सदस्य हुन्, डेभिड सिल्भा । उनले पछिल्ला केही वर्षयता टोलीको ठूला सफलतामा महत्वपूर्ण योगदान पुर्याउँदै आइरहेका छन् । स्पेनले सन् २००८ र २०१२ को युरोकपसहित सन् २०१० को विश्वकपको उपाधि जित्दा सिल्भाको पनि महत्वपूर्ण योगदान रहेको छ । स्पेन अघिल्लो संस्करणको विश्वकपमा भने समूहगत चरणबाटै बाहिरियो । साविक विजेताको हैसियतमा प्रतियोगिता खेल्न ब्राजिल पुगेको स्पेन समूहगत चरणभन्दा माथि जान सकेन ।
त्यसले स्पेनिस फुटबलको साख गिराउने काम गर्यो । त्यही गिरेको साख जोगाउन स्पेनले यसपटक उपाधि जित्ने योजना बनाएको छ । टोलीको त्यही योजनाको महत्वपूर्ण सदस्य हुन् सिल्भा । मिडफिल्डबाट खेल्दै स्ट्राइकरलाई नियमित रूपमा अवसर सिर्जना गरेर सहयोग पुर्याउने सिल्भा आफैं पनि गोल गर्न सक्षम देखिन्छन् । देब्रे खुट्टाले बल प्रहार गर्न माहिर सिल्भा प्राविधिक रूपमा निकै सशक्त खेलाडी हुन् ।
टोलीको कुनै पनि प्राविधिक निर्देशनमा उनी नै खरो उत्रने गर्छन् । त्यसले गर्दा पनि टोलीको पछिल्लो सफलतामा उनी छुटेका छैनन् । इङ्लिस क्लब म्यानचेस्टर सिटीसँग अनुबन्ध रहेका सिल्भासँग क्लब र राष्ट्रिय टोलीबाट प्रतिस्पर्धा गर्दाको प्रशस्तै अनुभव छ । उनको त्यही अनुभवले पनि टोलीलाई सफलतातर्फ डोहोर्याउन सक्ने छ । राष्ट्रिय टोलीबाट आफ्नो खेल जीवनको अन्त्यतिर आइपुगेकाले सिल्भा आफैं पनि रुस विश्वकपलाई अविस्मरणीय बनाउन चाहन्छन् । उनले आफ्नो त्यही इच्छा पूरा गर्दा स्पेनले रुस विश्वकपको उपाधि जित्न पनि सक्ने छ । सन् २००६ बाट स्पेनिस राष्ट्रिय टोलीबाट खेल्दै आइरहेका सिल्भाले अहिलेसम्म एक सय २४ खेल खेल्दै ३५ गोल गरेका छन् ।