मस्को : आफ्नो टोली जारी विश्वकपको प्रिक्वार्टरफाइनल खेलबाटै बाहिरिएपछि अर्जेन्टिनामा रक्षक जाभियर मास्चेरानोले अन्तर्राष्ट्रिय खेल जीवनबाट सन्न्यास लिएका छन् । अर्जेन्टिना नकआउट चरणमा फ्रान्ससँग ४–३ गोलले पराजित भएपछि मास्चेरानोले सन्न्यासको घोषणा गरेका हुन् । ‘राष्ट्रिय टोलीमा मेरो समय समाप्त भयो । अब म अर्जेन्टिनाको फुटबल समर्थक मात्र हुँ । खेलाडीको रूपमा अर्जेन्टिनाका लागि मेरो समय सकिएको छ । तर कुनै न कुनै रूपमा अर्जेन्टिनी फुटबलमा भने सक्रिय रहनेछु,’ ३४ वर्षीय मास्चेरानोले भनेका छन् ।
सन् २००३ मा यू–२० राष्ट्रिय जुनियर टोलीमा डेब्यु गरेका मास्चेरानोले सोही वर्षदेखि अर्जेन्टिनी सिनियर राष्ट्रिय टोलीमा प्रवेश पाएका थिए । अर्जेन्टिनाका सदाबहार खेलाडी मास्चेरानोले डेढ दशक एउटै लयमा राष्ट्रिय टोलीबाट खेले । सन् २००४ र सन् २००८ को ओलम्पिकमा समेत अर्जेन्टिनी टोलीको मुख्य रक्षम रहेका मास्चेरानोले विश्वकपमा अर्जेन्टिनालाई च्याम्पियन बनाउने आफ्नो सपना भने पूरा गर्न सकेनन् ।
मास्चेरानोले अर्जेन्टिनाका लागि एक सय ४७ खेल खेल्दै तीन गोल गरेका छन् । मास्चेरानोले सन् २००३ देखि सन् २००५ सम्म घरेलु क्लब रिभर प्लेटबाट व्यावसायिक फुटबल खेलेका मास्चेरानोलले त्यसपछि एक वर्ष ब्राजिलको कोरिन्थियन्सबाट खेले । सन् २००६ देखि एक वर्ष वेस्टहाम युनाइटेडबाट खेलेका मास्चेरानो त्यसपछि तीन वर्ष लिभरपुलसँग आबद्ध रहेका थिए ।
सन् २०१० देखि २०१७ सम्म बार्सिलोनामा आबद्ध उनी यसै वर्ष चीनको हेबेई चाइना फर्टियुनमा अनुबन्ध भएका छन् । मास्चेरानोले टोलीका कप्तान लियोनल मेसीले समेत सन्न्यास लिन सक्ने बताएका छन् । यद्यपि मेसी आफैंले भने यस विषयमा केही बोलेका छैनन् । मेसीले सन् २०१६ मै सन्न्यासको घोषणा गरे पनि केही समयपछि उनले आफ्नो सन्न्यास फिर्ता लिएका थिए ।
प्रतिक्रिया दिनुहोस !
